 | |
Куба 2010 хоригдлыг суллана
Кубын засгийн газар 2,010 хоригдлыг суллах болсноо мэдэгдлээ. Энэ нь сүүлийн жилүүдэд болсон хамгийн олон хоригдолд өршөөл үзүүлж буй явдал бөгөөд Трампын засаг захиргааны дарамт шахалт нэмэгдэж байгаатай холбоотой аж. Засгийн газар хоригдлуудыг сайн зан араншинтай байсан, эрүүл мэнд, үйлдсэн гэмт хэргийн төрлөөр нь сонгож суллана гэжээ. Суллагдах хүмүүсийн дунд залуу үе, эмэгтэйчүүд, 60-аас дээш насны ахмад настан, гадаад иргэд орно.
Гэхдээ хүчирхийлэл үйлдсэн, хүний амь насанд хүрсэн, бэлгийн дарамт, эсвэл засгийн эрх мэдлийн эсрэг гэмт хэрэг үйлдсэн хүмүүсийг суллахгүй.
Куба ихэвчлэн засгийн газарт эсэргүүцэл илэрхийлсэн хүнийг баривчилдаг гэж хүний эрхийн байгууллагууд үздэг. Үүнд идэвхтэн, сэтгүүлч, эсэргүүцэгчид багтана. Куба өмнө нь олон улсын хэлэлцээрийн хүрээнд хоригдлуудыг суллаж байсан. Жишээлбэл, 2025 оны эхэнд Куба АНУ болон Ватикантай хэлэлцээ хийсний дараа 553 хоригдлыг сулласан. Засгийн газраас энэ удаагийн өршөөлийг Христийн Ариун долоо хоногтой холбон тайлбарлаж байна. Гэсэн хэдий ч эдийн засаг нь хямарсан тул цаашид шоронгийн үйл ажиллагааг санхүүжүүлэхэд хүндрэлтэй байгаа аж.
АНУ Кубад газрын тос нийлүүлэхээ хязгаарласан нь шатахууны дутагдал, цахилгаан тасалдлыг нэмэгдүүлж байна. Олон сургууль хаагдаж, ажилчдыг цомхотгож, нислэгүүд цуцлагдсан байна. Куба 1959 оноос хойш АНУ-ын эдийн засгийн хоригт байгаа бөгөөд энэ нь худалдаа, хөрөнгө оруулалтыг хязгаарлаж иржээ.
