Вэб холбоос

 

Говийн бор залуугаа хангайн зөгийчин болгоод Түнхэл тосгондоо тав дахь жилийнхээ ойг үзэж байгаа дуучин Нараг нутгийн иргэд дээрэлхээд амжжээ.

Бие давхар болсон тэрбээр зөгийн аж ахуйнхаа дэргэд шинэхэн байшингаа барих гэтэл Түнхэл тосгоныхон "Чи манай нутгийн хүн биш, ялаануудаа аваад зайл” хэмээн хэдэн арваараа нийлж дайрчээ.

Тэр бүү хэл "Нарагаас тосгоноо аварцгаая”гэх хөдөлгөөн хүртэл үүсгээд авч. Энэ үйлдлийг Нара тайлбарлахдаа:

Миний сошиал суваг Түнхэл тосгоны эдийн засаг, хөгжилд хувь нэмрээ оруулсан. Байнгийн сурталчилгааны үр дүнд Түнхэл тосгоныг олон хүн мэддэг болсноор тосгоны айлуудын өрөм, сүү цагаа үнэд орж олдохоо байтал эрэлттэй болсон.

Орхигдсон тосгон хөл хөдөлгөөн болж амрагсадаар дүүрэн Баянбуурлыг ч хол орхив. Зөвхөн модоо тайрч, самар түүхээс өөр орлогогүй байсан айл өрхүүд илүү гэр барьж амрагч хүлээн аваад товхийтол амьдардаг болсон.

Гэтэл би газар ухаж сэндийчэн хууль бусаар амьдарсангүй. Ганц байшин бариад, орхигдсон тосгоноо хөгжүүлэн амьдрах гэсний минь төлөө тэдгээр хүмүүс "Нутгийн бидэнд газар олдохгүй байхад чамд газар олддог юу бэ” гээд сүрэглэн дайрсан нь ямар өчүүхэн, атаархуу, тамын тогооны үлгэрээр амьдарч байгааг харлаа хэмээн бухимджээ.

Мөн түүнчлэн Монгол хүн эх орныхоо хаана ч очиж амьдрах бүрэн эрхтэй. Хэн ч намайг эх орондоо байхад минь хөөх ёсгүй гэсэн юм . Хэрэв намайг хотынх гээд хөөж байвал хөдөөнийхөн хотод ирж түгжрэл нэмэн, гэр хороолол тэлж хөгжилд саад болдогоо болих хэрэгтэй. Хэзээ ч хөдөөнийхөн ирлээ, та нар явцгаа гэж байсангүй. Үнэхээр намайг хөөж байгаа бол хотод битгий нүүж очиж бай гэв.

Ийнхүү Ерөнхий сайдад хандаж " Хотын төвлөрлийг бууруулж залуусаа орон нутагт ажиллаж амьдрах хөшүүрэг бий болгон хөдөөгөө хөгжүүлнэ гэсэн төрийн бодлого юу болсон бэ?” Цааш нь түгээж өгөөрэй гэв.

Бие биедээ хайртай байцгаая л даа Монголчууд минь.

Эх сурвалж:  daam.mn Н.Болортуяа