 | |
Халдашгүй байдлын дэд хороо удахгүй хуралдана
УИХ-ын нэр бүхий дөрвөн гишүүний бүрэн эрхийг түдгэлзүүлэх хүсэлтийг Прокурорын байгууллагаас УИХ-д ирүүлээд байгаа. Хууль журмаараа бол энэ асуудлыг 48 цагийн дотор хэлэлцэж шийдвэрлэх учиртай.
Өнөөдөр энэ асуудлаар УИХ-ын Халдашгүй байдлын дэд хороо хуралдахаар байсан ч 14.00 цаг хүртэл хойшлуулаад байна. Энэ хороо өчигдөр хуралдах байсан ч ирц хүрээгүй гэсэн мэдээлэл байгаа юм. Дэд хорооны хурал хойшлуулах нэг шалтгаан нь гарын үсэг зурж ажил хаяад байгаа 40 гишүүний төлөөлөл Ерөнхий сайдын өрөөнд цугларч байгаатай холбоотой гэж зарим эх сурвалж мэдээлж байна.
Халдашгүй байдлын дэд хорооны дарга нь УИХ-ын гишүүн, Хууль зүйн дотоод хэргийн сайд Ц.Нямдорж. Таван хүний бүрэлдэхүүнтэй тус дэд хорооны гишүүд нь Н.Энхболд, Ч.Улаан, Ө.Энхтүвшин, Д.Лүндээжанцан нар ажээ.
Дахин тодотгоход Улсын Ерөнхий прокуророос ирүүлсэн УИХ-ын гишүүн Д.Дамба-Очир, Г.Солтан, Б.Ундармаа, Л.Энхболд нарын бүрэн эрхийг түдгэлзүүлэх хүсэлтийг тус хороо хэлэлцэх юм. Эдгээр гишүүдийн хувьд ЖДҮХС-аас авсан зээлтэйгээр холбоотой асуудал яригдаж байгаа билээ.
М.Нэргүй
