 | |
Улсын хөрөнгөөр тоглосон Ч.Сайханбилэг, М.Зоригт нараас хариуцлага нэхэх хэрэгтэй
Сонгуулийн үеэр сонгогчид намууд болон эрх баригчдаас янз бүрийн л "бэлэг" хүлээн авч байлаа. Тэднээс онцгойрч тодорсон ганц "бэлэг" бол орон нутагт том оврын онгоцыг хямдралтай үнээр нислэг үйлдүүлэх шийдвэр байв.
Тухайн үед нь зам тээврийн сайд болон Ерөнхий сайд тэргүүтэй Засгийн газрынхан уг асуудлыг төдийлөн ойшоож үзээгүй.
Харин өнгөрсөн аравдугаар сард Зам, тээврийн хөгжлийн дэд сайд Б.Цогтгэрэл Ховдод осол гаргасан онгоцны талаар мэдээлэл хийсэн. Түүний хэлж буйгаар уг онгоцоос болж улсад нийт 8 тэрбум төгрөгийн хохирол учирсан гэдэг. Тухайн үед нь онгоцыг засварлаад дахин үйл ажиллагааг нь үргэлжлүүлнэ гэсэн мэдээллийг албаныхан өгч байсан ч үнэн байдал нь шал өөр гэдгийг эрх бүхий эрхэм мэдээлсэн. Дээрээс нь тус онгоц нь манай онгоц биш. Түрүүсийн онгоц байсан. Уг онгоцыг 2014 онд үйлдвэрээс дөнгөж гарсан даруйд нь бид түрээслэж хэрэглээр авсан бөгөөд үйл ажиллагааны түрээстэй явж байсан юм.
Ийнхүү үнэн мөнийг нь ил болгосноос хойш дөрвөн сар өнгөрлөө. Улсад их хэмжээний хохирол учруулсан нөхдүүдэд хариуцлага тооцох систем гэж байна уу. Тухайн үеийн Ерөнхий сайд Ч.Сайханбилэг, Зам тээврийн сайд М.Зоригт тэргүүтэй хүмүүсээс эхлүүлээд хариуцлагын тогтолцоо гэж зүйл байдаг гэдгийг харуулах хэрэгтэй.
Хамгийн гол нь Ховд аймгийн аэродром нь том онгоцыг байнга буулгаж, хөөргөх боломжгүй байсныг эх сурвалжууд мэдээлж байгаа юм. Хэдийгээр хатуу хучилттай буултын талбайтай ч гэсэн боингын зэрэглэлд хүрч чадахгүй, нимгэн бөгөөд нарийн замтай юм байна. МИАТ-аас Засгийн газарт хандаж дээрх зөвлөмжийг удаа дараа хүргүүлсээр байхад төрийн өмчит гэдгээр нь шахалт үзүүлж хүчээр Ховд руу том онгоцоор нислэг үйлдүүлж байжээ. Ийнхүү болохгүй гэсэн газар руу хямд үнээр, маш их эрсдэл үүрч том онгоц нисгэж буй шалтгаан нь мэдээж баруун аймгийн сонгогчдын саналыг авах гэсэн эрх баригчдын сонгуулийн шоу байлаа.
Ховдын нисэх зурваст боинг 737 онгоц нь шаардлагатай тохиолдолд 1-2 удаа л ослын буулт хийх боломжтой аж. Гэтэл жижиг онгоц буух зориулалттай, том онгоц буулгаж, хөөргөх боломжгүй аэродром дээр улс төрийн ашиг сонирхолоор онгоц нисгэж төрийн өмчит компанийг төдийгүй иргэдийг аюулд оруулж байлаа. Тэгвэл уг үйл явдлын гор одоо гарч байна. Нислэг үйлдэх боломжгүй хэмээн мэргэжлийнхэн удаа дараа сануулаад байхад сонгуулийн шоунд зориулж хэдэн арван хүний амь насыг эрсдэлд оруулж, дээрээс нь маш их хэмжээний хохирол учруулах хэмжээний шийдвэр гаргасан тухайн үеийн Ерөнхий сайд болон Зам тээврийн яамны холбогдох албан тушаалтнуудаас хариуцлага нэхэх нь зүйтэй.
Б.Анир
ZALUU.COM
