Олимпод оролцсон Монголын анхны эмэгтэй боксчин М.Мягмаржаргал эхний тойрогт 2019 оны дэлхийн аварга, Их Британийн Лорен Прайст ялагдаж тэмцээнээ өндөрлүүлээ. Түүний тулааныг үзсэн үзэгчид өмссөн хувцаст нь шүүмжлэлтэй хандаж байна. Тухайлбал рингэн дээр тулалдахдаа өмссөн хувцас нь аль улсын тамирчин болохыг илтгэх ямар нэгэн лого байгаагүй байна.
Тэрээр цэнхэр булангаас хөх өнгийн өмсгөлтэй тоглохдоо улсынхаа далбаа, нэрийг хувцсандаа хадуулаагүй байжээ. Олон улс, тив дэлхийн тэмцээнд ч баг тамирчид улсын нэр, далбааг хувцсандаа байршуулдаг. Гэтэл дэлхийн хамгийн олон үзэгчтэй олимпод ийнхүү орсон нь олны шүүмжлэлийг дагуулаад байна.
