Вэб холбоос

Нийслэлийн Засаг даргын зөвлөлийн хурлаар хичээлийн шинэ жил, боловсролын салбарын бүтээн байгуулалт, зам засвар, арчлалт зэрэг асуудлыг хэлэлцэв. Нийслэлийн хэмжээнд өнгөрсөн долоодугаар сард түр зуурын усархаг аадар бороо орсны улмаас иргэд усанд боогдох, орон сууцны зоорийн давхар усанд автаж, хөрсний ус нэвтрэх зэрэг нөхцөл байдал үүсч, үерийн улмаас хоёр хүний амь нас хохирчээ. Мөн үерийн улмаас 41 барилга усанд автсан байна.

Нийслэлийн Захирагчийн ажлын албанаас мэргэжлийн байгууллагад хандан техникийн дүгнэлт гаргуулан ажиллаж байгаа аж. Хувийн компаниуд барилга бариад иргэдэд борлуулдаг ч эргээд хариуцлага хүлээдэггүй учраас үер усны аюулаас иргэдийн амь насыг төрийн байгууллагын алба хаагчид хамгаалж байгааг Нийслэлийн Засаг даргын зөвлөлийн хуралдааны үеэр танилцуулав. Мөн орсон борооны улмаас гол болон туслах замууд ихээхэн эвдэрсэн. Нийслэлийн зургаан дүүрэгт нүхэн эвдрэл үүсчээ. Уг эвдрэлд 11 мянга 604 метр квадрат нөхөөс хийх зайлшгүй шаардлага тулгарсан байна. Энэхүү нөхөөсийг хийхэд 757.7 сая төгрөг шаардлагатай аж. Мөн 775 метр кубын хөвөөнд эвдрэл үүсч 25.5 сая төгрөгийн хөрөнгө шаардлагатай юм байна. Цаашлаад 88 метр урт хашлага эвдэрснийг засварлах, 100 метр кубэд шуудуу цэвэрлэгээ хийх, хайрган хучилттай 2.2 километр замыг сэргээж янзлах шаардлага тулгарчээ.