 | |
“Өгий цом-2015” тэмцээн ба Өгий нуурыг хамгаалах санаачлага
Архангай аймгийн нутаг даь Өгий нуурыг
мэдэхгүй Монгол хүн байхгүй биз ээ. Сүүлийн жилүүдэд байгалийн тансаг
бүхэн хосолсон энэ нуурын усны түвшин багасч, экологийн тэнцвэрт
байдал алдагдахад хүрчээ. Өгий нуурыг усаар тэтгэж байсан "Хөгшин” Орхон
гол ч зундаа нуураа хүрэлгүй татарч усаар хангаж чадахаа больжээ. Ийм
хүнд нөхцөл улам даамжирвал Өгий нуурын загас жараахай, ургамал устаж,
нуур тэр чигтээ байхгүй болох аюултай.
Өгий нуурт одоо зурхай, алгана, шивэр сугас зэрэг найман төрлийн загас үржиж байгаа аж. Загас элбэгтэй тул тэнд хулгайн анчид очиж тор, тэсэрч дэлбэрэх бодис ашиглан хороох болжээ. Иймээс Өгий нуурыг хамгаалах, унаган төрхөөр нь үлдээх зорилго бухий төрийн бус байгууллагууд бий болсны нэг нь "Өгий сан” юм. Тус сан дан ганц Өгий нуурыг хамгаалахад үйл ажиллагаагаа чиглүүлэх бус Монголынхоо гол нууруудын экосистемийн тэнцвэрт байдлыг хангахад анхаарч ажиллаж байна.
"Өгий сан”-гаас санаачлан удахгүй энэ сарын 14-нд "Өгий цом-2015” тэмцээн зохион байгуулахаар болсон байна. Энэ үеэр мөсний загасчлалын тэмцээн болон мөсөн шагайн тэмцээн зохион байгуулж, БОНХАЖЯ-наас "Өгий нуурын экологийн өнөөгийн байдал” семинар хийх ажээ.
Эдгээр арга хэмжээний гол зорилго гэвэл зүй зохистой загасчиллыг олон нийтэд ойлгуулах, Өгий нуурыг цаашид хэрхэн хамгаалах талаар төрийн бодлогын түвшинд асуудлыг боловсруулах явдал аж.
Загасчлах спортын нэг онцлог нь авласан загасаа алж ашиглах бус харин амьдаар нь буцаагаад усанд нь тавихад оршдог. "Өгий цом-2015”-ын үеэр үүнийг хүмүүст загасчид маань биечлэн үзүүлнэ гэж "Өгий сан”-гийн Удирдах зөвлөлийн гишүүн Г.Мөнхсайхан, Х.Ганбаатар нар ярьж байна. "Өгий сан”-гийн тэргүүн нь МАН-ын Ерөнхий нарийн дарга Ж.Мөнхбат юм билээ.
"Өгий сан”-гийн санаачлан зохион байгуулах "Өгий цом-2015”-д Монголын засагчлах спортын холбоодын нэгдэл, Монголын Флай фишинг холбоо зэрэг төрийн бус байгуулагууд хамтран ажиллах ажээ.
