 | |
Дуучин Жавхлан шинэ жилээс татгалзахыг уриаллаа
Шинэ жилийн баярыг том хүн хүүхэдгүй тэсэн ядан хүлээдэг. Баярын уур
амьсгал хаа сайгүй орж урлаг соёлынхон ч хоолойгоо тордож хичнээн
байгууллагын шинэ жилд уригдан, ямар ханшаар дуулахаа бэлтгэж буй нь
тодорхой. Эд сезоны энэ үеэр МУГЖ дуучин С.Жавхлан эхнэр Г.Эрдэнчимэгийн
хамт шинэ жилийн ямар нэгэн арга хэмжээнд оролцохгүй болсон талаар
хэвлэлийн бага хурал хийлээ. Тэрээр "Эдийн засгийн хямрал ихтэй үед сая
саяар нь мөнгө үрж байхаар хоол хүнсгүй иргэдэд энэ мөнгөө зарцуулья”
хэмээн уриалж буй юм. Тэрээр халтуур хийхгүй хандивийн тоглолт хийж
тэндээс олсон орлогоо Увс аймгийн эмзэг бүлгийн 390 өрхөд хандивлах
болсон тухайгаа хурлын үеэр хэлж байсан.
Тэрээр "Монголын хямрал баяраас баярт явчихаад байна. "Гацуурын баяр” гэж сагсуурсан, хоосон хөөсөнд хамаг юмаа зарцуулдаг ийм хачин юмнаасаа энэ жилдээ татгалзцгаая. Тархины тураал улс төрд, гэдэсний тураал нийгэмд бий болчихоод байна. Увс аймгийн төвд л гэхэд 390 өрх идэх хоолгүй байна гэсэн судалгаа гарсан. Аймаг орон нутгаас тэдэнд хоолны толан олгох маягаар аргацааж байна. Увс аймгийн 390 өрхөөр дундажлан тооцоход нийслэлд наад зах нь 2280 өрх өлсгөлөнд нэрвэгдэж байгаа. Тиймээс энэ жил шинэ жилээс бүгд татгалзаж, шинэ жилд үрдэг мөнгөө ходоод нь хонхолзож яваа хүүхдүүдэд зарцуулъя” гэлээ. "Монгол өлсөх учиргүй” тоглолт 12 дугаар сарын 12-нд 19.00 цагаас Монгол бөхийн өргөөнд болох аж. Түүний санаачлан хэрэгжүүлж буй энэ ажилд Увс аймгийн нутгийн зөвлөл болон элэг нэгт хүн бүрийг хамтран ажиллахыг урьж байна.
