 | |
Д.Трамптай хамтран ажиллах нь НҮБ-ын шинэ тэргүүнд амаргүй байж магадгүй
Португалын Ерөнхий сайд асан Антонио Гутерриш НҮБ-ын ерөнхий нарийн бичгийн даргын ажилдаа орлоо. Дональд Трампын удирдах АНУ-ын шинэ засаг захиргаатай хамтран ажиллахад түүнд амаргүй байж магадгүй гэж ажиглагчид үзэж байна.
А.Гутерриш өмнө нь НҮБ-ын дүрвэгчдийн асуудал хариуцсан дээд комиссарын албан тушаалыг өмнө нь хашиж байсан юм. Тэрбээр өчигдөр НҮБ-ын тэргүүний үүрэгт ажилдаа орсон байна. Энэ албан тушаалыг тэрбээр таван жилийн хугацаанд хашна. НҮБ-ын гишүүн орнуудын олонхын саналаар түүнийг өнгөрөгч оны 10 дугаар сард тус байгууллагын тэргүүнээр сонгосон юм.
Хамгийн эмзэг бүлгийнхэнд анхаарлаа илүү хандуулахаас гадна ядуурал, эмэгтэйчүүд болон дүрвэгчид зэрэгтэй холбоотой асуудлыг шийдвэрлэхийн төлөө хүчин чармайлт гаргана гэж А.Гутерриш амласан билээ.
Энэ сарын 20-нд Ерөнхийлөгчийн тангараг өргөх Д.Трампын засаг захиргааны хатуу байр суурь нь түүний ажилд бэрхшээл учруулж магадгүй юм.
НҮБ-ын зүгээс анхаарлаа хандуулдаг гол асуудлуудын нэг болох уур амьсгалын өөрчлөлтийн асуудлыг Д.Трамп "зохиомол сэдэв” гэж нэрлэсэн билээ. Мөн Палестины эзлэгдсэн газар нутагт еврейн суурин барьж буй Израилийн талыг дэмжиж байгаагаа Д.Трамп илэрхийлж байв. Харин АНУ-ын одоогийн захиргаа Израилийн энэ үйлдлийг зэмлэн буруушааж байгаа юм.
АНУ бол НҮБ-ын Аюулгүйн Зөвлөлийн байнгын таван гишүүн орны нэг бөгөөд НҮБ-ын төсвийн 20 гаруй хувийг бүрдүүлдэг.
Г.Доржханд
Эх сурвалж: Монцамэ
