 | |
АӨСҮТ-ийг Хөдөлмөрийн гавьяаны улаан тугийн одонгоор шагналаа
Ерөнхийлөгчийн зарлигийн дагуу Арьсны өвчин судлалын үндэсний төвийг Хөдөлмөрийн гавьяаны улаан тугийн одонгоор шагналаа. Ерөнхийлөгчийн зарлигт "Арьс өнгөний алба байгуулагдсаны 90 жил, Арьсны өвчин судлалын үндэсний төв байгуулагдсаны 70 жилийн ойг тохиолдуулан арьс, өнгөний халдварт өвчнийг эмчлэх, эрүүлжүүлэх, эмч мэргэжилтнүүдээ чадваржуулах, шинэ технологийг нэвтрүүлэх, хүн амыг эрүүл чийрэг өсгөхөд мэргэжил, ур чадвараа дайчлан ажиллаж ирсэн тус төвийн мэргэжилтнүүдийн хичээл зүтгэлийг өндрөөр үнэлж, Хөдөлмөрийн гавьяаны улаан тугийн одонгоор шагнасугай” гэжээ.
Ерөнхийлөгчийн Тамгын газрын дарга П.Цагаан шагнал гардуулж хэлсэн үгэндээ "Монголын ард түмэн бахдам түүхтэй, сайн сургамжтай. Нэг хэсэг дэлхийг донсолгож байсан ард түмэн салж бутран бусдын дарлалд хүртэл орж байсан удаатай. Хожим ардын хувьсгалын үр дүнд эрх чөлөөгөө сэргээн мандуулах үеэр Монголын хүн ам 600 мянга гаруйхан байсан. Тухайн үед газар аваад байсан элдэв өвчин эмгэгийн дотроос арьс өнгөний өвчинг дурдаж болно. Иймээс 1926 онд Ардын засгийн газраас Арьсны өвчинтэй тэмцэх алба байгуулсан юм. Энэ хугацаанд төр засгаас хүлээлгэсэн үүрэг, түмэн олны өмнө өргөсөн тангарагтаа үнэнч байсан үе үеийн эмч, асрагч, сувилагч нарыг ийнхүү урамшуулан шагнаж байна. Монголын хүн ам өсөн нэмэгдэж, гурван саяд хүрсэн. Монгол хүний дундаж наслалт долоон жилээр уртассан.
Энэ бол нийт эрүүл мэндийн салбар болон та бүхний гавьяа. Өнөөдрийн энэхүү шагналаар дамжуулан та бүхний гавьяаг урамшуулахын зэрэгцээ ирээдүйд ажиллах урам зориг, итгэл өгч буй хэмээн ойлгох хэрэгтэй. Дэлхий даяаршиж, монголчууд олуулаа болж, шинэ технологи хөгжиж байна. Эдгээр өөрчлөлттэй уялдуулан үргэлж шинэ санаачилга дэвшүүлж, анхдагчийнхаа буухиаг цааш үргэлжлүүлэн улс орныхоо хөгжил, хүн ардынхаа эрүүл мэндийг хамгаалахад улам их хувь нэмэр оруулна гэдэгт итгэж байна” гэв. Энэхүү арга хэмжээнд Эрүүл мэндийн сайд А.Цогцэцэг, Арьсны өвчин судлалын үндэсний төвийн ерөнхий захирлын үүрэг гүйцэтгэгч Ц.Уранчимэг болон тус төвийн үе үеийн эмч, ажилтнууд оролцлоо.
