 | |
"Мэргэжлийн хяналтыг сэргээх юм байна. Хэдүүлээ төрийн байгууллагаараа тоглоод л байна даа"
УИХ-ын чуулганы төгсгөлд “Засгийн газарт чиглэл өгөх тухай” Улсын Их Хурлын тогтоолын төслийг хэлэлцлээ. Тодруулбал, ТББХ-оос Төрийн байгууллагын бүтээмжийг дээшлүүлэх, үр ашиггүй зардлыг бууруулах, иргэнд очих төрийн үйлчилгээг чирэгдэлгүй, түргэн шуурхай болгох хүрээнд холбогдох хууль тогтоомжийн төслийг боловсруулах, зарим арга хэмжээг хэрэгжүүлэхийг Засгийн газарт чиглэл өгөх тухай УИХ-ын тогтоолын төслийг боловсруулж, чуулганы нэгдсэн хуралдаанд танилцуулан хэлэлцүүллээ.
УИХ-ын дарга Н.Учрал:
Хоорондын уялдаа холбоогүй шалгалт их ирдэг талаар компани ААН-үүдээс маш олон гомдол ирж байгаа. Мэдээж шалгалт хийх нь зөв ч учиртай. "Эрдэнэт" ТӨҮГ-т 2023 онд төрийн 10 байгууллагаас 36 удаа хяналт шалгалт хийжээ. 2024 онд 9 байгууллагаас 34 удаа мөн шалгалт хийжээ. Эдгээр нь хоорондоо холбоо хамааралгүй байгууллагууд юм. Ийм нөхцөлд аж ахуй нэгжүүд ажиллах нь хүндрэлтэй.
Төрийн хяналт шалгалтын чиг үүргийг салбарын 11 яаманд шилжүүлснээр төлөвлөгөөт хяналтын хэрэгжилт хангалтгүй болсон. Үүнийг цэгцлэхгүй бол бизнес эрхлэхэд хэцүү, иргэдийн аюулгүй, эрүүл амьдрах орчныг бүрдүүлэхгүй байна гэсэн үг.
УИХ-ын гишүүн А.Ариунзаяа:
Илүү ойлгомжтой хэлэхэд Мэргэжлийн хяналтын байгууллагыг л сэргээнэ л гэж ойлго хэрэгтэй. Хэдүүлээ төр, төрийн байгууллагаараа тоглосон л асуудал болоод байна. Гэхдээ би хувьдаа Мэргэжлийн хяналтын байгууллага байх нь зөв гэж боддог. Яам бүр дээр очсон хяналтын ажилтнуудыг буцаан нэг газарт төвлөрүүлэх юм байна. УИХ-ын тогтоол өөрөө биелэгдэх боломжтой гэдэг утгаараа 2026 оны 1-р сарын 1-нд ийм арга хэмжээ авах даалгавар өгч байгаа нь биелэгдэх боломжтой эсэхэд эргэлзэж байна.
УИХ-ын дарга Н.Учрал хариуд нь:
Яам бүрд байгаа, улсын байцаагч гэсэн нэртэй, улаан канттай бланктай, тамгатай, хэний удирдлага дор ажиллах нь мэдэгдэхгүй хэдэн хүнтэй болчхоод байна. Тиймээс төлөвлөгөөт шалгалтыг уялдаа холбоотой, давхцуулахгүй байх хэрэгтэй байна. Жишээ нь хүнсний аюулгүй байдлыг шалгахаар 8 байгууллага очиход хувийн хэвшил яаж ажиллах юм бэ. Тиймээс ЗГ энэхүү давхардсан хяналт шалгалтаа бууруулах, хавар "Хяналт шалгалтын тухай хууль"-иа оруулж ирэх нь зүйтэй.
