 | |
“Хан ресурс” дахин шүүхэд хандлаа
"Хан ресурс” компани АНУ-ын шүүхэд олон улсын арбитрын шүүхийн шийдвэрийг баталгаажуулах хүсэлт гаргажээ.
Уг шийдвэрээр 2015 оны гуравдугаар сарын 2-нд олон улсын арбитрын шүүхээс Монголын Засгийн газар хууль бусаар компанийн ураны лицензийг цуцалснаас үүдсэн "Хан ресурс”-т төлөх нөхөн төлбөрийг тогтоосон юм.
Шийдвэрт тогтоосон үндсэн нөхөн төлбөрийн дүн 80 сая ам.доллар бөгөөд жилийн 2 хувийн хүүг 2009 оны долдугаар сарын 1-нээс бодож, нэмэлт 9.1 сая ам.долларыг нэхэмжилснээр нийт 104,289,162.95 ам.доллар болсон.
"Хан ресурс” энэ удаа гадаад арбитрын шийдвэрийг албадан хэрэгжүүлэх, хүлээн зөвшөөрүүлэх НҮБ-ын конвенц болон АНУ-ын Холбооны арбитрын хуулинд үндэслэн өргөдөл гаргасан аж.
"Хан ресурс” компанийн захирал Грант Эдди "Монгол Улс шийдвэрт заасан төлбөрийг барагдуулах хүсэлгүй байгаад харамсаж байна. Гэтэл Монголын Засгийн газар нэг тэрбум ам.долларын Засгийн газрын бонд гаргах гэж буйгаа зарласан. Үүний зэрэгцээ Монгол Улсын Ерөнхий сайд зургадугаар сарын 23-27-ны өдрүүдэд АНУ-ын Нью-Йорк, Вашингтон хотноо айлчилж, хөрөнгө оруулалтыг сурталчилах гэж байна. Олон арбитрын шүүхийг үл хүндэтгэдэг ийм улсад хөрөнгө оруулагчид хөрөнгө оруулах уу гэдгийг бодох хэрэгтэй” хэмээн ярьжээ.
Монголын Засгийн газрын хувьд "Хан ресурс"-ын асуудлаар давж заалдах тухай мэдээллийг өнгөрсөн гуравдугаар сард өгч байсан билээ.
news.mn
