Вэб холбоос

"Бард төдөл буюу сонсохын хүчээр чөлөөлөгдмуй” гэсэн энэ номыг манай эриний VIII дугаар зууны үед энэтхэгийн их гүрү Бадамсамбуу Төвдөд бичсэн байна. Энэ мэдлэгийг одоо эзэмших цаг нь болоогүй тул цаг нь болохоор олох ёстой хүн нь олох болно гээд  хэзээ ямар хүн олох талаар тодорхойлон хэлээд номоо Түвдийн өмнө зүгт орших Дакпо нутгийн Ганподар ууланд бүжиж  буй бурханы ойролцоо чандлан нуусныг 600 жилийн дараа түүний урьдчилан хэлсний дагуу Карма Линга гэдэг хүн олж авсан байна.

 

Үүнийг анх америкийн антропологич болон ардын үлгэр түүх цуглуулагч  Иванс Уэинц (Evans Wents) 1927 онд англи хэлнээ хөрвүүлж хэвлэснээр дэлхий нийтийн хүртээл болгосон түүхтэй юм байна. Манайд ерээд оны үеэр Бард төдөлөөс товчлон хөрвүүлж сонинд нийтлүүлсэн байсныг та бүхэнд хүргэе. Уг хөрвүүлсэн ламд гүн талархал илэрхийлье.

 

Энэ  ахуйг орхиод явах цаг чинь боллоо. Үхлийн өөрт мэдрэгдэх шинжүүд: бүх бие хүндрэн жихүүдэс хүрч хүйтэнд умбана. Нэг бол халуу оргиж,үгүй  бол хүйт даана. Нүд харанхуйлж гал бутарч үзэгдэнэ. Удахгүй нүдэнд гал бадарч чикай бардад шилжинэ. Анхааралтай байж бодлоо төвлөрүүл. Сайн сонс. Сайн хар. Мөнхийн гурвал болох каяаг харж мэдрэхийг хичээ.

Дхарма каяа- үйлийн үр (Reality)

Самбхо каяа- цэцэн ухаан (Perfect Resource)

Нирмана каяа-төрөл хувирах (Emanation)

 

Хамгийн сүүлийн амьсгалаа гадагшлуулаад та дахин хэзээ ч амьсгаа авахгүй. Үүний дараа мөнхийн ариун гэрлийг олж харна. Өмнө чинь зах хязгааргүй орчин нээгдэнэ. Чи орь ганцаар өд мэт хөнгөхөн хөвөх болно. Битгий баяс. Битгий ай. Энэ бол чиний үхлийн цаг. Үхлийг ашигла.

Энэ бол аугаа их боломж, хэрэв чи гялбаа үзвэл энэ бол яруусан тодорсон бодит ахуйн мөнхийн гэрлийн гялбаа гэж ойлгох хэрэгтэй. Чиний өөрийн оюун ухаан бол одоо ахуйгаас тусгаарлагдан ариусан цэвэршиж гялтганан гялалзах бөгөөд чиний ухамсар юм. Оюун ухаан ухамсар хоёрын нэгдэл мөнхийн үйлийн үр мөн.

Одоо чиний оюун ухаан төрөх үхэхийг мэдэхгүй. Энэ чинь дангаараа л мөнхийн гэрэл будда Амитаба ажээ. Анхаарлаа төвлөрүүлэн мөнхийн гэрлийг хайгтун. Олж хараад түүнийг энэ байна гэж хүлээн ав. Түүнийг олж хараад танин мэдэж чадвал үнэн хэрэгтээ чи юу болохыг хүснэ, тэр болж чадна. Нууцад нэвтэрвэл үхэл амьдралын хуулийг ойлгож өөрөө энэхүү гэрэл болно. Энэ бол хүн болгоны хүрч чадах шулуун зам биш юм.

Чи мөнхийн гэрлийг олж харж чадаагүй бол дараагийн бардад шилжихийн өмнө хоёрдахь гэрлийг үзэх болно. Олж харахыг хичээ. Хэрвээ олж харж, нэрлэж хүлээж авч чадвал цаашдаа олон  юмнаас зайлсхийж чадна гэсэн үг. Гэрлийг олж харуутаа өөрийн шүтээн мэт хүлээн авах хэрэгтэй.  Энэ 2 дахь гэрлийн үе амьсгал зогссоны дараа хэдэн цаг үргэлжилдэг.

Амьдрах хүч чинь биеийн нэг онгорхой цэгээр гадагшлах бөгөөд ухаан санаа яруусч, эргэн тойрондоо байгаа бүхнийг олж харна. Найз нөхөд төрөл төрөгсдөө харах төдийгүй тэдний яриаг сонсох болно. Өөрийн орхисон бие мах бодио болон одоо эзэмшиж буй биеэ хараад өөрийгөө нүднээ үл үзэгдэгч тунгалаг болсноо мэдэрнэ.

Үүнийг мэдрээд айхгүй байвал нэгэн мөчид аврал ирнэ, нууц зам нээгдэнэ.  Энэ бол хоёрдогч мөнхийн гэрэл.  Өөрийгөө өөрчлөгдсөнийг мэдээд шинэчлэгдэж, гэрлийг мэдэрч хүлээж авснаар өөрөө гэрэлд шингэнэ.

Гэрлийг таниагүй буюу харж чадаагүй бол мөнхийн харуулуудыг ямар ч дүрээр харна, тааралдана.  Хэдийгээр чи гэрлийг хараагүй боловч ухааран сэргэсэн бол,  хаана байгаагаа мэдэрсэн бол бодолдоо агуулах ганц зүйл чинь номхон хүлцэнгүй байх ёстой.

Юутай ч, тааралдсаны өмнө толгой гудайлган, амьд сэрүүндээ мэддэг байсан ганц тарнийг ч болов уншиж итгэж шүтэж явсан зүйлдээ мөргө. Замчин тааралдваас түүнд захирагд, таларх, бишрэн мөргөж ханд.  Их зам өмнө чинь нээгдэнэ. Ийнхүү  чикай бард 3-3,5 хоног үргэлжилнэ.

Энэ бард ойролцоогоор 15 хоног үргэлжилнэ.  Ер нь үхлийн 3  бард нийтдээ 49 хоног болно.  Хэрэггүй болсон бие мах бодио орхисон оюун ухаан чинь Чикай бардыг дамжаад хонид  бардад  шилжинэ .

Хонид бардад  анхаарах зүйлс:  бүү ай, битгий яар, анхаарал болгоомжтой  бай. Чи үхсэн. Үүнийг ойлгоод  өнгөрсөнтэйгөө  бүү зууралд. Сэтгэл хөдлөл чинь чамайг аймшигтай газар аваачина. Энэрэн хайрлах сэтгэлээр  эргэн тойрноо хар. Зүүд зэрэглээ мэт хурц гэрэл, аянга тэнгэрийн дуу мэт их чимээ гарган өмнө чинь дүүжигнэнэ.  Чи нэгэнт үхсэн тул чамайг юу ч айлгаж чадахгүйг бүү март. Чи хүссэн зүйлдээ хувирч чадна. Энэ дуу чимээнд хувилж нэгд.  Энэ дуу бол сүүлчийн мөн чанар чинь мөн.

Хэрэв чадахгүй бол чамайг аймшиг нөмөрнө. Мөс цөмрөх мэт гай зовлонгийн өөр ертөнц рүү  унаж  мэднэ. Бодлогогүй мэдрэмжээсээ болгоомжил.  3 өдрийн турш  өөрт юу тохиолдсоныг ойлгож мэдэхгүй байсан бол сэргээд битгий сандар.  Чи их өөрчлөгдөж бүх зүйл өөрчлөгдсөн. Толинд бүү хар.  Ойр дотныхныгоо бүү зовоо. Чи урьд өмнө үзээгүйгээ үзэж, сонсоогүйгээ сонсох болно. Үүний эх үүсвэр бол чиний зүрх сэтгэлийн чинь мандал юм.  Энд чи гэгээрэх боломжтой.

Энэ бардад шилжсэн анхны өдөр сансар огторгуй чиний өмнө хөх гэрэл болон үзэгдэнэ. Энэ өдрийн газар бол цагаан Будда Вайрочины эзэмшил бөгөөд тэрээр цав цагаан биетэй цэв цэнхэр гэрэл цацруулна. Энэ гэрэл маш хурц, маш их дөлтэй тул айж эмээх сэтгэл төрүүлнэ. Хэн айхгүй энэ гэрэлд  итгэж хүлээж авна, тэр бардын аугаа их  зовлонгоос чөлөөлөгдөнө. Үүнийг дагалдаж буй бүдэг цагаан гэрэлд  хэрхэвч автаж болохгүй, ингэвээс  замаасаа төөрнө гэсэн үг.

Энэ өдөр бол нэвтрэхийн жаргал болон толины цэцэн зөнг шингээсэн цагаан галын өдөр юм.  Мөн энэ өдөр нүгэлтнийг авахаар тамын хаалга ч нээгдэнэ. Тэндээс  утаа маягийн  бараан гэрэл  гарах бөгөөд ихэд  ойр халуун дотно санагдана. Гэвч энэ дотно хар гэрэл рүү бүү хар.  Муу үйл, уур уцаар чинь чамайг  там руу түлхэж чадна.

Тамд нэг унавал тэндээс буцах зам урт удаан. Энэ өдөр уурлаж  уцаарлахаас зайлсхий. Газар дээр үлдэгсэд чиний өмч хөрөнгийг  хуваан маргаж, эсвэл хайрт хань чинь чамайг  мартсан байхыг үзэж болно. Энэ мөчид л дүрсхийн уурлавал тамд уналаа гэсэн үг.

Энэ өдөр цэвэр усан мах бодь чамд цагаан гэрлээр харагдах болно. Дорнын  ялагдашгүй  төгс  Будда Акшобхъяа  хөх биенээсээ хурц  цагаан нүд гялбам гэрлээ цацруулсаар ирнэ.  Энэ цагаан гэрлийг хайр,  ёс журам,  гоо сайхан болон төгс төгөлдөр дагалдана.

Дорнын 6 тэнгэрийн тэмдэг солонгын  өнгөөр үзэгдэнэ. Үүний хажуугаар там болон муу муухайг дагуулсан хар хүрэн гэрэл ч бас байна. Хүний муу муухай  зан чанар цагаан гэрлээс нүд гялбан буруулж айна. Тэр тийнхүү хар гэрлийг дагана. Ухаалаг бай. Энэ хар гэрэл чамайг тодорхойгүй арчаагүй ирээдүй рүү хөтөлнө гэсэн үг. Хурц цагаан гэрлийг айлгүй сонго.

Энэ гурав дахь өдөр чиний  цэвэр шороон мах бодь шар гэрлийн хэлбэрээр чамд үзэгдэнэ. Энэ өдөр өмнө зүгийн цэвэр шар гэрэл ноёрхоно.  Өмнө зүгийн Будда Раднасамбава шар биенээс шар гэрэл цацруулна.  Хэрэв  шар гэрлээс айж,  түүнтэй сүлэлдэн туяарч  буй бүдэг цэнхэр гэрлийг дагаваас  газар дээрх шинэ амьдралд эргэн орж  зовлонг дахин амсах болно.

Энэ өдөр цэвэр улаан галын өдөр. Эргэцүүлэхүйн  цэцэн ухаан хоёрт захирагдана. Өрнийг  эзэгнэгч бүхнийг мэдэгч  Будда Амитаба  хүлцэл ач буян, дуу хуур,  гал зэрэг дагуултайгаа  хурц  улаан гал бадруулсаар ирнэ.  Хорвоогийн амьдралтай холбоотой нэгэн хэмийн бүдэг улаан гэрэл дагалдана.

Энэ гэрэл нүглээ  наминчлаагүй  заяа муутнуудын сүнсний  оронд аваачих  тул  зугт. Энэ өдөр, өс хонзон  хайр сэтгэл  буюу газар дээрх амьдралд хорогдсон аль нэг тэмүүллээс болж хий үзэгдэл, буга чөтгөр болон  азгүй сүнсүүд төрдөг. Тэд цаашид бардыг туулж авралд хүрч чадахгүй.

Энэ өдөр хий мах бодь цэвэр ногоон өнгөөр туяарч үзэгдэх бөгөөд хойд  зүгийн чин  зоригт гүйцэлдүүлэгч  Будда Амогасидхи заларна. Хурц  ногоон  гэрэл нь хардах, үл итгэх, атаа жөтөөний цайвар ногоон гэрэлтэй сүлэлдэнэ. Энэ нь үргэлж дайсагнан тэмцэгч хар санаат аваргуудын оронд аваачих тул  хурц  ногоон гэрлээс  бүү ай.

Энэ өдрийг хүртэл чамд  бүхий л тэнгэрлиг тэмдгүүд болох гэгээрсэн таван ухааны бурхад болон чиний гэрлэн бүтцийн нууцууд чамд нэг нэгээрээ цувран үзэгдсэн нь энэ. Чи нэгэнт тэднийг таньж мэдээгүйгээс өнөөдрийг хүрсэн тул одоо анхааралтай бай. Энэ өдөр эдгээр таван бурхдын нэгдэл бүгдээрээ ус, гал, хий, шороо  4 мах бодийн илрэл болсон шар, ногоон, цагаан, улаан гэрлүүд зэрэг зэрэг асах болно. Тэдэнтэй нэгд. Тэднийг хайрла.  Салшгүй нэг хэсэг нь бол. Өөрийгөө анхдагч, төрөөгүй бодлын байдалд оруул.

Чамд ямар ч эхлэл дүгнэлт тодорхой байдал байхгүй. Эдгээр гэрлийн аль нэгийг сонгож болохгүй. Бүгдэд нь адил хандаж өөрийн тусгал болсон тэднийг хайрла. Тод гэрлийн хажуугаар бүдэг гэрлүүд тусах боловч тэдэнд битгий авт.  Автвал авралгүй өөр ертөнц рүү унана. Ийнхүү бурхантай, өөрөө өөртэйгөө нэгдэж чадвал бүх нууцад нэвтэрч, чамд мэдэхгүй зүйл гэж байхгүй болно. Энэ өдөр өөрийн зүрх сэтгэлийг таних сүүлчийн өдөр.

Энэ өдөр чи эрдэм мэдлэгийг захирах хоолойн чакрамд шилжинэ. Энэ өдөр өнгө  өнгөөр  гялалзах  гэрэл  чиний  дээр  эргэлдэн, мэдрэхүйн 5 тэнгэрүүд өөр өөрийн өнгө чанарыг илэрхийлэн,  сүртэй чанга хөгжмийн аянд бүжиглэнэ. Тэд сайныг шагнах,  мууг шийтгэхээр ирсэн. Тэд асар хурц гэрэл цацруулах тул харж  үл тэвчин тайван ногоон гэрэлд тэмүүлбээс амьтны аймгийн олон зовлонг урт удаан хугацагаар эдлэх болно.

Тэднээс айлгүй хамт бүжиглэ,  туслалцаа өглөг  гуй.  Өөрт гялалзагч таван галыг шигээснээр диваажинд орох үүд чинь нээгдэнэ. Өөрт чинь үзүүлж буйг  таньж  мэдэн түүнд хувилбал чөлөөлөгдөнө. Шинж нь: үүлгүй цэлмэг тэнгэр, хурц тод нар, анхилам хүжсийн үнэр, нууцлаг агаарт эгшиглэх хөгжим.

Анхдагч гэрлийг таниад ууссан хүн шууд  дхарма  каяад хүрнэ. Хэзээ ч бард төдөлийг унших шаардлагаүй болно. Хонид бардад ухаарч сэнхэрсэн хүн төрөл дамжих хэлхээг шууд таслан дэлхий дээр ирвэл хүн төрөлхтнийг гэгээрүүлэх гэж ирнэ.  Самбхо каяад хүрлээ гэсэн үг.  Хэрвээ  Сидна бардад хүрч байж сая  таньж  мэдвэл сайн төрөл олох боломж багасна.  Төрөл хувирах нирмана каяа түвшинд байна. Гэвч хичээвэл энд ч дээгүүр төрөл олох хүмүүсийн дунд төрж, үхлээр тасалдсан амьдралаа үргэлжлүүлэн хөгжин дэвших боломж байна.

Бурхад болоод оюун ухааны тэмдгүүдийг эзлэх өдрүүд. Энэ өдрийг хүтэл  хонид бардад шилжсэн анхны өдрөөс эхлэн гэгээрсэн 5 бурхад болон тэдний дагуулууд болох энхийн сахиусан тэнгэрүүдтэй таарсан боловч чи тэднийг таньж мэдсэнгүй. Одоо чи энэ өдрөөс эхлэн догшин сахиусуудтай таарах болно. Тэдний үзэгдэх дүр энхийн сахиулуудаас тэс өөр аймшгийн дүртэй цус уугч сахиулууд аварга том дүрээр харагдана. Битгий ай.

Эдгээр нь тантрын ёсны бясалгалын догшин сахиусууд бөгөөд үнэн хэрэгтээ чиний өмнөх өдрүүдэд таарсан ухааны таван бурхадуудын хувилсан дүрс юм. Тиймээс тэднээс айлгүй тэднийг таньж тэдэнд мөргө.  Тэд бүгд чиний өөрийн оюун ухаанаас урган гарч буйг санахтун.  Тэр цагт чамд аврал ирнэ.

Хонид бардын амьд тэмгүүдийг харж мэдээгүйн учир чи өөрийгөө олсонгүй, одоо чи Сидна бардад байна. Энэ нь дэлхийнхээс тэс өөр. Чиний ухамсар сэргэж нэг мэдэхнээ чи урьд амьд үеийнхтэйгээ адил биетэй мэдрэмжтэй чөлөөтэй хөдөлнө. Кармын жирийн бус  хүчний нөлөөгөөр чи бусдыг, тэд чамайг харна. Урьдынхтай ижил боловч илүү төгс . Учир нь, хүсэл мөрөөдөл итгэл найдвар ирээдүйн билэгдлүүдээс төрсөн  Ирээдүйд  төрөх газар орон  хамт амьдрах хувь тавилантай хүмүүсээ харна. Гэвч бүү авт.  Энэ бол бардын бэрх урт удаан зам.

Сидна бардад өөрийгөө үрэлгүй, сэтгэл хөдлөлд авталгүй байх нь чухал.  Шунал тачаалгуй сайн санаатай байж чадвал эндээс гарч дахин төрөхдөө  ой ухаанаа хадгалах буюу гээсэн ч илүү дээгүүр төрөл олж болох юм. Хэрэв  өөрийгөө захирч чадвал эхийн умайд орох шаардлагаас мултарна. Сидна бардад чи кармын хүчээр уул хад хэрмийг  ч нэвт гарч дуртай газраа очиж, дуртай зүйлээ үзнэ. Чи бүх газар хүрэвч  сүнсний аугаа их төв болон эхийн умай хоёрт л нэвтэрч үл чадна.

Бардад чи хожим хувь заяа чинь чамтай уулзуулах амьтдыг харна. Чи  49 хоногоо хүртэл 22 хоног иийм байдлаар Сидна бардад өнгөрүүлнэ.  Амьд сэрүүндээ өөрийгөө цэгнэн хянахыг хичээж,  үхэх төрөх,  амьдралын тухай  байнга санаж байсан хүмүүсийг энд аз жаргал баяр хөөрөөр угтана , гэхдээ хууртаж  болохгүй.

Сидна бардад үзэх сайн, муу, аймшигтай, гэгээтэй  зүйлүүд бүгд өөрөөс чинь, бодлоос чинь урган гарч  байгааг сана.  Энд  хэн ч туслахгүй,  хамгийн гол нь тайван байж сур.  Чиний хувь заяаг хэн ч өөрчлөхгүй.  Чи дээд зэргээр ганцаардах тул бие хайж эхэлнэ. Гэвч төрөл авах гэж бүү яар. Аль тааралдсан умайд орвол алдаж мэднэ.  Зөвхөн зовохын тулд төрвөл яана.

Шүүх: Энэ ертөнцөд үзэж буй чиний бүх зовлон чамаас  өөрөөс чинь л гарч байгаа юм.  Хэрэв чи зовлонгоосоо салж чадахгүй бол сайн сүнс сайн үйл бүрийг чинь цагаан чулуугаар,  муу сүнс муу үйл бүрийг чинь хар чулуугаар овоо босгоно.  Үүнийг хараад чи айж худлаа хэлж хашгична.

Тэгэнгүүт  эрлэг номун  хаан гартаа хувь тавилангийн толь барин ирж, тэнд чиний сайн муу үйл бүгд ялгаран харагдана.  Чи үнэнийг мэдэрнэ. Дараа нь эрлэгүүд  чамайг бүгдийг ухааран ойлготол  элдвээр тамлан зовооно.  Энэ нь эрлэг чамайг тамлаж байгаа биш  чи өөрөө өөрийгөө зовоож байгаа нь энэ.

Энэ бүхэн хий хуурамч  үзэгдэл боловч өвдөхийн зовлон  нь жинхэнэ юм. Нүгэл буянаа дэнслүүлэхдээ бүү худал  ярь. Эрлэгээс битгий ай. Түүнээс хамгаалж туслахыг гуй. Бурханд залбир. Тэгвэл аврагдана . Энэ чиний сүүлчийн боломж . Одоо л амьдралын нууцыг ойлгохгүй бол өнгөрсөн бүхнээ мартан ой ухаанаа алдана.

Зургаан ертөнц: Дахин төрөхдөө 6 ертөнцийн хаана ч төрж болно.  Чиний очих ёстой ертөнц чамд хурцаар гэрэлтэнэ.

Тэгш цагаан гэрэлтэй нь тэнгэр нарын ертөнц

Тэгш ногоон гэрэлтэй нь асур нарын ертөнц

Тэгш шар гэрэлтэй нь хүний ертөнц

Тэгш хөх гэрэлтэй нь араатан амьтны ертөнц

Улаандуу гэрэлтэй нь бирд нарын ертөнц

Хар саарал сүлэлдсэн гэрэлтэй нь тамын ертөнц

Төрөх 4 арга зам бий:  өндөгнөөс,  умайнаас, жир бус замаар  үр тарианаас төрнө. Тэнгэр,  асур,  бирд, тамын ертөнцөд жирийн бус аргаар төрнө.  Хүний болон амьтны ертөнцөд төрөл олбол умай шаардагдана.

эх сурвалж: budda.mn

Tweet