 | |
Видео
Шинэ мэдээ
Францад шатахууны татварыг ирэх оны турш нэмэгдүүлэхгүй
"2019 онд шатахуун түлшний татварыг нэмэхийг бүхэлд нь цуцалсан" гэж тэрбээр хэлсэн байна.
Францын Ерөнхий сайд Эдуар Филипп "шар хантаазтнууд”-ын шаардлагын хариуд Засгийн газраас арга хэмжээ авч эхэлснийг мягмар гарагт мэдэгдсэн билээ. Тухайлбал, тэрбээр бензин болон дизель түлшинд нэмэлт татвар ногдуулахыг зургаан сараар хойшлуулсныг, мөн автомашины техникийн үзлэгийн зардлыг нэмэгдүүлэх шийдвэрийг цуцалж, цахилгаан эрчим хүч болон хийн татварыг түр хугацаанд зогсоосныг мэдээлсэн юм.
Францын парламентын доод танхим лхагва гарагийн орой Засгийн газраас өргөн барьсан татварын багц арга хэмжээг дэмжин баталсан байна. Одоо энэ асуудлыг парламентын дээд танхим хэлэлцэх ёстой. Францын Ерөнхий сайд пүрэв гарагт сенатын танхимд үг хэлнэ.
Францад автомашины шатахууны үнийг нэмэгдүүлэхийг эсэргүүцсэн "шар хантаазтнууд”-ын хөдөлгөөн 11 дүгээр сарын дунд үеэс хойш олныг хамарсан эсэргүүцлийн ажиллагаа зохион байгуулж байгаа юм. 2019 оны нэгдүгээр сарын 1-нээс бензиний үнийг 3 центээр, дизель түлшний үнийг 6.5 центээр нэмэгдүүлнэ гэж тус улсын эрх баригчид өмнө нь мэдэгджээ. Үнэ ийнхүү өсөх болсны шалтгаануудын нэг нь Францын Засгийн газар хүлэмжийн хийн хаягдалд экологийн татвар ногдуулсантай холбоотой байна.
montsame.mn
Санал болгох:
