|
Видео

Шинэ мэдээ

П.Доржсүрэн: Э.Бат-Үүл баатартай уулзахдаа гаргасан таван заалтыг журамд тусгаагүйд л иргэд бухимдаад байна

П.Доржсүрэн: Э.Бат-Үүл баатартай уулзахдаа гаргасан таван заалтыг журамд тусгаагүйд л иргэд бухимдаад байнаХан-Уул дүүргийн нэхмэлийн 10-1 тоотод оршин суудаг П.Доржсүрэнтэй тус байрны дахин төлөвлөлттэй холбоотой асуудлаар ярилцлаа.

-Та нэхмэлийн байранд хэзээнээс амьдарч байгаа вэ. Байр шинэчлэх ажил ер нь хэзээнээс эхэлсэн юм бэ?

-Би энэ байранд олон жил амьдарч байгаа хүн. Харин энэ байрыг шинэчлэх асуудлыг хөөцөлдөөд 16 жил болж байна. Нийслэлийн ерөнхий төлөвлөгөөний газар, Нийслэлийн өмчийн харилцааны газар, Нийс­лэлийн Засаг даргын Тамгын газар, Нийслэлийн эдийн засгийн хөгжлийн газрын дарга нар бүгдээрээ орон сууц шинэчлэх ажилд иргэдээ дэмжээд, үзэл бодлоо хуваалцаад явж байгаа.

Бидний хамтын ажиллагаанд ямар нэг саад тотгор болсон зүйлгүй. Дүүрэг орон нутгийн зүгээс биднийг маш сайн дэмждэг. Ж.Ганхуяг даргын хувьд ямар ч үед намайг хүлээж аваад "Иргэдийн санаа бодол юу байна, орон сууцаа шинэчлэхэд хамгийн гол нь бэлэн байр сонгохыг бодоорой. Тэгвэл дүүрэг, хороо, иргэд аль нь ч эрсдэлд орохгүй” гэж хэлдэг. Энэ тал дээр бидэнд ямар ч будлиан байхгүй.

-Иргэд ямар учраас уриа лоозон барьж, эсэргүүцээд байгаа юм бэ?

-Сууц өмчлөгчдийн хувьд олон ургальч үзлийнхээ дагуу үзэл бодлоо илэрхийлж байгаа байх. Үүнд төрийн бус байгууллага болон миний бие иргэдийн ямар ч хөдөлгөөнд оролцохгүй. Тийм шаардлага ч байхгүй. Би Монгол Улсын зөвлөх инженер, иргэний үйлдвэрийн барилгын инженер хүн. Тэгэхээр энэ төслийн барилга, техник, технологийн бодлогоо барьж явна. Бид "Чингисийн өргөн чөлөө” орон сууцны цогцолбор хороолол гэж нэр өгсөн.

Үүнд нэхмэлийн 19, арьс ширний тав, эрчим хүчний нэг, байшин угсралт комбинатын хоёр гэсэн нийт 27 байрыг л шинэчлээд, иргэдэд одоо эзэмшиж байгаа талбайгаа, мөн дээрээс нь 8-12 м2 талбайг үнэгүй авна.

Түүнчлэн түрээсийн төлбөрөө зах зээлтэйгээ уял­дуулж авна. Хэрвээ иргэд талбайгаа нэмж авахаар бол зах зээлийн үнэтэй уялдуулж авах тухай 22 төрлийн заалт бүхий баримт бий.

Энд ямар нэгэн эрсдэл байхгүй. Яг үүнийхээ дагуу "Фүжи холдинг” компанитай гэрээ байгуулаад явж байна. Тус компани 8-12 м2 талбай үнэгүй өгнө гэсэн болохоор гэрээ хийсэн. Харин "Орчлон” констракшны тухайд таван м2 гэж тохирсон. Тиймээс бид арай ахиу талбай өгнө гэсэнтэй нь гэрээ хийгээд явж байна. Хоёр компани болон бидний хооронд ямар нэг асуудал байхгүй.

Иргэд өөрсдөө аль компаниа сонгох эрх нь нээлттэй байгаа. Үүний дагуу нэхмэлийн 10 байрны 200 гаруй өрх гэрээ байгуулаад явж байна. Энэ нь 10 байрны нийт өрхий 80 орчим хувь болж байна.

Хан-Уул дүүргийн хуучин 27 барилгыг буулгаад шинэчилнэ. Үүнийг хийхдээ ийм бодлого хэрэгжүүлнэ. 1000 гаруй иргэн дэмжиж гарын үсэг зурлаа гэх мэт зүйлсийг багцлаад Нийслэлийн Ерөнхий төлөвлөгөөний газрынханд өгсөн.

Ер нь нийслэлийн хаа нэг газар бүтээн байгуулалт хийхэд НЕТГ-ынхан байх ёстой. Ийм учраас бид хамтарч ажиллаад өдий хүртэл явж байна. Журмыг боловсруулж гаргахдаа "Эв эе өргөө” ТББ-аас санал аваагүй. Иргэд, дүүргээс санал аваагүйд гол нь байгаа юм. Э.Бат-Үүл баатартай уулзахдаа гаргасан таван журмыг тусгаагүйд л иргэд бухимдаад байна.

Тодруулбал Э.Бат-Үүл даргатай уулзахад "Сууц өмчлөгчдийн иргэдийн боловсруулсан төсөл, хөтөлбөрийг хот онцгой анхаарч байгаа.

Бид хоёр жилийн хуга­цаанд шинэчилнэ. Нийслэлийн үлгэр жишээ хороолол болгоно. Та бүхэн боломжтой бүхнээ хий. Санал хүсэлтээ зоригтой илэрхийл. Би дэмжиж, шийдэж өгье” гэх мэт таван зүйлийг хэлсэн.

-Шинэ байр баригдтал иргэдийн амьдрах орон байрны асуудлыг хэрхэн шийдэж байгаа бол?

-Компаниудтайгаа тохи­рол­цоод түрээсийн мөнгө авч байгаа. Үүнд ямар нэг асуудал байхгүй. Харин хол газар руу нүүхээр бол иргэд өндөр өртөг гаргаж чадахгүй гэж байгаа.

Үүнийг Нийслэлийн Засаг даргын Тамгын газар, "Эв эе өргөө” ТББ, барилгын компани гурав гурван талт гэрээгээр шийдвэрлэнэ.

-Барилгын ажил хэзээ эхлэх вэ?

-Ирэх оны дөрөвдүгээр сард барилгаа буулгаад тэр сардаа барилгын ажлаа эхлүүлнэ. Иргэд журамд дахиад өөрчлөлт оруулах вий, дахиад тендэр зарлах вий. Хэрвээ тэгвэл товлосон хугацаандаа ажил эхлэхгүй удаашрах нь гэж болгоомжлоод байгаа. Журамд долоон заалт бий. Ерөнхий хугацаагаар 24 сарын дотор буулгасан барилгыг шинэчилнэ гэж заасан байгаа.

Түүнд нь иргэдэд чирэгдэл учруулахгүй гэх мэт 20 нөхцлийг тусгасан.

Өглөөний сонин
М.Санчир

Сэтгэгдэл

АНХААРУУЛГА: Уншигчдын бичсэн сэтгэгдэлд www.KINGNEWS.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.