Вэб холбоос

УИХ-ын Хууль зүйн байнгын хороо өчигдөр 11.00 цагт хуралдах байсан ч ирц хүрээгүйн улмаас дахин хойшиллоо. Энэ талаар Хууль зүйн байнгын хорооны дарга Ш.Раднаасэд "Өнгөрсөн сарын 20-ноос хойш арван удаа ирц авсан. Тэр бүрт хотод 4-5 гишүүн байсан. Харин өчигдөр /уржигдар/ хамгийн өндөр ирцтэй байсан ч харамсалтай нь ирц бүрдсэнгүй. Өчигдөр дахиад ирц бүрдэхгүй нөхцөл байдал бий боллоо. Наймдугаар сар гарчихсан гишүүд тойрогтоо ажиллаж, гадаад дотоодод чуулганы завсарлагаанаар явсан байна. Тиймээс ирц бүрдэхгүй байна. Таван гишүүн гадагшаа явсан бол дөрвөн гишүүн тойрогтоо ажиллаж байна.

Өчигдөр хоёр, гурван гишүүн тойрог руугаа явсан. Тиймээс ирц бүрдэх ямар ч боломжгүй байна. Гэхдээ ээлжит бус чуулганы асуудлыг Хууль зүйн байнгын хороо шийдэхгүй. Байнгын хорооны хуралдаанаар АТГ-ын дарга Х.Энхжаргалыг үүрэгт ажлаас нь чөлөөлөх асуудлыг хэлэлцэнэ. Уг асуудлыг УИХ-ын гишүүн Л.Оюун-Эрдэнэ болон Ерөнхийлөгч УИХ-ын даргад тавьсан учраас өнгөрсөн сарын 19- нд УИХ-ын даргын зөвлөл хуралдаад Хууль зүйн байнгын хороогоор эхлээд ярь. Түүний дараа хууль зүйн үндэслэл байна гэвэл энэ асуудлыг чуулганаар хэлэлцье гэдэг шийдвэр гаргасан. Энэ хүрээнд л өнгөрсөн сарын 20-ноос хойш Хууль зүйн байнгын хороо хуралдах оролдлого хийж байна. "60 тэрбум”- ын гэх хэргээр нээлттэй сонсгол хийх тухайд үүнийг ганц байнгын хороо дур мэдээд шийдчихдэг юм биш.

УИХ-ын Дэгийн тухай хуульд Сонсгол зохион байгуулах гээд тусдаа бүлэг байна. Энэ хуулийн дагуу тухайлсан хэргээр нээлттэй сонсгол зохион байгуулах боломжгүй гэж үзсэн. Үүнийг Л.Оюун-Эрдэнэ гишүүнд мэдэгдсэн” гэлээ. Харин Байнгын хорооны ирц бүрдүүлэх тухайд тэрбээр "Хуралд ирж оролцох нь гишүүдийн үүрэг. Түүнээс гишүүдийг энд байлгаж, хуралд нь суулгах нь миний үүрэг биш” гэдгийг хэллээ.

М.Тогтох