 | |
Хятадын засгийн газар Филиппинд $14 саяын зэвсэг, техник бэлэглэхээр болжээ
Филиппиний ерөнхийлөгч Родриго Дутертэгийн хар тамхины эсрэг тэмцэл, терроризмийн эсрэг ажиллагаанд зориулж Бээжингийн эрх баригчид $14 саяын үнэ бүхий галт зэвсэг, хөнгөн завь бэлэглэх болсныг Филиппиний батлан хамгаалахын сайд Мягмар гарагт мэдээллээ.
Үүнээс гадна Бээжингээс Манилад $500 саяын урт хугацаатай зээлийг зэвсэг, техникт зориулж өгөхөөр болсон байна.
Бэлгийн зэвсэг, техникийг ирэх оны хоёрдугаар улиралд авахаар болжээ.
Ердөө зургаан сарын өмнө Хятад, Филиппин улсууд маргаантай арлуудын асуудлаар шүүхдэлцэж Гаагийн олон улсын шүүх Филиппиний талд шийдвэр гаргаж байсан юм. Гэвч ерөнхийлөгчөөр сонгогдсон Родриго Дутертэ гадаад бодлогодоо өөрчлөлт оруулж, Вашингтоноос зайгаа барин Бээжинтэй ойртох болсон.
Аравдугаар сард Бээжинд хийсэн айлчлалынхаа үеэр тэр Хятадаас $24 тэрбумын хөрөнгө оруулалт, худалдааны амлалт авсан юм.
Дутертэгийн явуулж буй хар тамхины эсрэг тэмцлийг Вашингтон шүүмжилж, Америкаас 27,000 галт зэвсэг худалдаж авах хүсэлтийг нь зөвшөөрөөгүй. Үүний хариуд Дутертэ Хятад, Оросоос зэвсэг авна гэж ярьж байв.
Филиппинийг колоничолж байсан Америкчууд сүүлийн 20 орчим жилийн турш хуучин зэр зэвсгээр Манилаг хангасаар ирсэн юм. 2002 оноос хойш Америкийн армийн хэрэглэж байсан $800 сая орчмын өртөгтэй зэр зэвсэг, хөлөг онгоц, нисдэг тэрэг, радио холбоо, радарын техникийг Филиппинчүүд хүлээж авсан байдаг. Өнгөрсөн онд тэд түүхэндээ хамгийн том тусламж авсан нь $82 саяын өртөгтэй байжээ.
Эх сурвалж: South China Morning Post
