 | |
Цочир хүйтрэлийн үеэр сургууль, цэцэрлэгийг амраах албан ёсны шийдвэр гараагүй байна
Ойрын өдрүүдэд тохиох цочир хүйтрэлтэй холбогдуулан сургууль, цэцэрлэгийг түр хугацаагаар амраах эсэх талаар иргэдийн санал олон нийтийн сүлжээгээр гараад байна.
Энэ талаар албан ёсны шийдвэр гарсан эсэхийг БСШУСЯ-тай холбогдож тодрууллаа.
"БСШУСЯ-нд албан ёсоор хандаж, амрах санал гаргасан зүйл байхгүй байна. Хэрэв ямар нэгэн шийдвэр гарах бол хуулийн дагуу явах ёстой. ОБЕГ-аас шаардлагатай гэж үзээд манайх руу албан тоот хүргүүлсэн тохиолдолд яамнаас шийдвэр гарна. Одоогоор өөрчлөлт орох асуудал хөндөгдөөгүй байна" гэлээ.
СУРАГЧДЫН ХИЧЭЭЛИЙН ХУВААРЬТ ӨӨРЧЛӨЛТ ОРУУЛАХ ТУХАЙ ХУУЛИЙН ЗААЛТ:
15 дугаар зүйл.Ерөнхий боловсролын сургуулийн хичээлийн жилийн эхлэх, үргэлжлэх, дуусах хугацаа
15.1.Ерөнхий боловсролын сургуулийн хичээлийн жил нь 9 дүгээр сарын 1-ний өдөр эхэлнэ.
15.2.Хичээлийн жилийн үргэлжлэх, дуусах хугацааг боловсролын асуудал эрхэлсэн төрийн захиргааны төв байгууллага тогтооно.
15.З.Нутаг дэвсгэрийн байгаль, цаг уур, үйлдвэрлэл, үйлчилгээний онцлог, байгалийн болон нийтийг хамарсан гамшигтай холбогдуулан онцгой дэглэм, хорио цээр тогтоосон нөхцөлийг харгалзан ерөнхий боловсролын сургууль, мэргэжлийн сургалт-үйлдвэрлэлийн төвийн хичээлийн жилийн эхлэх, үргэлжлэх, дуусах хугацааг аймаг, нийслэлийн Засаг даргын саналыг харгалзан боловсролын асуудал эрхэлсэн төрийн захиргааны төв байгууллага тухайн үед нь өөрчилж болно.
15.4.Хичээлийн жилийн эхлэх, үргэлжлэх, дуусах болон суралцагчдын амралтын хугацааг энэ хуулийн 15.3-т зааснаас бусад нөхцөлд өөрчлөх, хичээлийг түр хугацаагаар хаахыг хориглоно.
Ikon.mn
