 | |
"Өөрийнхөө алдааг өрөөлд тохох нь хамгийн арчаагүй улстөр"
Ардчилсан намынхан захиалгат, явуургүй, ээлжит нэгэн дайралтаа Монгол
Ардын Намд хаяглан илгээжээ. Гэхдээ тэд энэ удаа ахиухан мөнгө зарж
"ард түмний тархийг угаах” гэж оролдов. "Оролдов” гэдгийн учир нь дээрх
нэвтрүүлгийг үзсэн хэн ч юу ч ойлгохгүйд оршино. Ардчилсан намынхан
Монгол Ардын Намыг муулах гээд өөрсдийгөө "байдалд” хийчихэж байгаа ч юм
шиг... Тун тодорхойгүй. Ямар сайндаа л үзэгчид "Арга ядсан ч хогнууд
бол доо” хэмээн сэм ярилцан, дам муулж байх вэ дээ. Өөрийн тарьсан
балгийг өрөөлд тохох гэж үзсэн нь бүтэлгүйтэв бололтой. Ардчилсан
намынхан уг нэвтрүүлгийг бүтээж, цацахын тулд дор хаяж 300-гаад сая
төгрөг зарсан нь тодорхой. Хайран мөнгө, хайран цаг хугацаа. Ард түмэн
тэнэг биш гэдгийг тэд одоо болтол ойлгоогүй бололтой. Өнөө Эбэ
Ерөнхийлөгч нэг удаа "Би гараад л ард түмнээ хошгируулаад л...” гээд
аваад хаячихсан шүү дээ. Тэр үе шигээ санаж явдаг бололтой юм. Ардчилсан
нам хошгируулж ард түмэн хошгирдог цаг аль хэдийнэ талийж одсон.
Өнөөдрийн Монголын эдийн засгийн доройтол, ард түмний ядуурал Ардчилсан
намын төр барьсан дөрвөн жилтэй яалт ч үгүй шууд холбогдоно. Тэд
өөрсдөөсөө хичнээн зайлуулаад ч нэмэргүй. Өнөө орой телевизүүдээр тараан
цацах ".................” нэвтрүүлэгт нь Монгол Ардын Нам засаг барьж
байхдаа ард түмэнд бэлэн мөнгө тараасан л гэнэ... Өнөөдрийн эдийн
засгийн уналт үүнээс үүдэлтэй л гэнэ... Яг нарийндаа бол Монгол Ардын
Нам засаг толгойлж байсан 2008-2012 оны хоорондох дөрвөн жилийн
хугацаанд Монгол Улсын эдийн засгийн өсөлт түүхэн дээд амжилт тогтоож
байсныг тухайн үеийн хэвлэлээс олоод үзчихэж болно. Харин энэ өсөлт
үргэлжлэх үү, уруудах уу гэдгийг 2012 оны сонгууль шийдсэн. Ард түмэн
Ардчилсан намд цөөхөн хэдэн суудал илүү өгсөн нь өнөөдрийн эдийн засгийн
уналтын гол үндэс болсон гэлтэй. Саяхан МУИС-ийн урилгаар манай улсад
Германы толгой эдийн засагч Ханс Вернер Зинн хэмээх эрхэм ирж лекц
уншаад буцсан. Тэрбээр өөрийн лекцээ "Монгол нурж байгаа улс шиг
харагдаж байна. Учир нь засаг толгойлсон нам ард түмнээсээ асуулгүй их
хэмжээний өр тавьсан нь ингэж харагдахад хүргэжээ” гэж эхэлсэн юм.
Улмаар цааш нь "Монгол Улс маш богино хугацаанд буюу хоёр жилд 2.2
тэрбум төгрөгийн их өр үүсгэж, тансаг хэрэглээ нь өсч байгаа нь буруу
замналаар эдийн засаг нь нурсан улс шиг харагдаж байна” хэмээсэн.
Ардчилсан нам түүхэндээ парламентийн танхимд хоёр дахь удаагаа олонх болсон нь хурдацтай өсч байсан эдийн засгийг зогсоож улмаар уруудах эхлэлийг нь тавьсан гэхэд болно. "Шинэчлэл”-ийн тодотголтой Н.Алтанхуягийн Засгийн газар танхимаа бүрдүүлсэн даруйдаа "Чингис”, "Самурай” бонд гаргасан нь Монгол Улсын зээлжих зэрэглэлийг хормын дотор хоёрдугаар зэрэглэлд оруулаадхав. Өнөөдрийн шалдаа буутал унасан эдийн засаг, ноён долларыг царайчлах төгрөгийн сулрал эндээс эхлэлтэй. Харин Ардчилсан намын нөхдүүд энэ бурууг Монгол Ардын Намынхан хийсэн юм шиг харагдуулах гэж хичээж буй нь үнэхээр харамсалтай. Үнэн хэрэгтээ Монгол Ардын Нам засаг барьж байхдаа "Эх орны хишиг-Эрдэнийн хувь” хэмээн иргэн бүртээ тараасан 21.000 төгрөг ард түмний амьдралд ихээхэн нэмэр болж байсныг иргэд одоо ч ярьдаг. Харин Ардчилсан намынхан, тэр дундаа "Шинэчлэл”-ийн Засгийн газар "Чингис”, "Самурай” бондоо "хогны ногоон уут” хийж хогийн цэг дээр хаяж, нэг жилийн настай цэцэг "тарьж” үхүүлэн үр ашиггүй зарцуулсан нь өнөөдрийн эдийн засгийн хямралын гол үндэс болсныг ард түмэн мэднэ. Их Британийн аугаа улстөрч Уинстон Черчилль нэгэнтээ "Өөрийнхөө алдааг өрөөлд тохох нь хамгийн арчаагүй улстөр” хэмээсэн нь өнөөдрийн Ардчилсан намд зориулсан гэлтэй санагдана.
Уинстон Черчилль
