 | |
Хятад дахь iPhone үйлдвэрт хөл хорио тогтоож, ажилчид нь зугтжээ
Хятадын эрх баригчид коронавирусийн халдварын тархалтыг хяналтад байлгахын тулд "тэг ковид" бодлого баримтлан, ковидын тохиолдол тун цөөн илэрсэн ч хөл хорио тавьж, бүх хүнийг шинжилгээнд хамруулах арга хэмжээ авсаар байна.
Энэ удаад Жэнжоу дахь Тайванийн Foxconn Technology Group -ийн iPhone үйлдвэрлэдэг үйлдвэрт долоо хоногийн хөл хорио тогтоожээ. Энэ үйлдвэрийн 20 гаруй ажилчнаас коронавирусийн халдвар илэрсэн тул ийнхүү үйлдвэрийг ажилчдын хамт хаахаар болсон байна.
Хөл хорио 11 дүгээр сарын есний өдрийг хүртэл үргэлжлэх бөгөөд хүмүүс болон машины хөдөлгөөнийг хориглосон, гагцхүү эмнэлгийн түргэн тусламжийн машин, нэн шаардлагатай бараа бүтээгдэхүүн нийлүүлэх машинуудыг л үйлдвэрийн бүс рүү нэвтрүүлэх аж.
The Telegraph сонины мэдээлснээр, хөл хорио тогтоосны дараа зарим ажилчин хоол хүнсний хангамж болон ахуйн орчин хангалтгүй хэмээн гомдол мэдүүлсэн бол зарим ажилчин коронавирусийн халдвар авахаас эмээж байгаа тул үйлдвэрийн шугам руу гарч ажиллахгүй хэмээжээ. Түүнчлэн олон ажилчин үйлдвэрээс зугтаж, хаалт хашааг эвдэж байгаа бичлэг тархсан байна. Лхагва гарагийн байдлаар байдал тогтворжсон хэмээн Foxconn компани мэдэгджээ. Үйлдвэрээс явах хүсэлтэй хүмүүст зориулан тусгай автобус гарган, гэрт нь хүргэж байгаа хэмээсэн байна.
Чэнжоу дахь Foxconn үйлдвэрт 300 мянга орчим хүн ажилладаг. Энд хөл хорио тогтоосны дараа үйлдвэрийн ажиллагаа хэвийн үргэлжилнэ гэж компанийн удирдлага мэдэгдсэн ч бүрэн хөл хорионд орсон энэ үйлдвэр сэлбэг хэрэгслээ хэрхэн татаж авах, бэлэн бүтээгдэхүүнээ хэрхэн гадагш нийлүүлэх нь тодорхойгүй байгаа юм. Мөн хөл хорионы улмаас олон ажилчин ажлын байраа орхин явснаар үйлдвэрлэлтийн хэмжээ 30 хувиар буурч болзошгүй гэсэн таамаглал гарчээ. Улмаар учрах алдагдлыг нөхөхийн тулд Шэньжэн дэх өөр нэг үйлдвэрийнхээ үйлдвэрлэлийг нэмэгдүүлэхээр төлөвлөж байгаа аж.
Г.Бямбасүрэн
