Вэб холбоос

Бид мөнгөтэй болмоор байна, англи хэл сурмаар, машин авмаар байна, байр авмаар байна гэх мэтээр байнга л үглэж байдаг. Ингэхэд бид эдгээр хүслүүдээ биелүүлэхийн төлөө юу хийсэн билээ? Та өдрийн хэдэн цагт нь унтаж, хэдэн цагт нь амиа аргацаасан хөдөлмөр эрхэлж , хэдэн цагт нь дэмий бодлогоширч эсхүл цаг хугацааг хий дэмий үрсэн үйлдэл хийж байдаг вэ?

Одоо би цаг зарцуулалт, хүч хөдөлмөрийн тухай бичих гэж байна. Яг үнэндээ The Snowball, Warren Buffett and the Business of Life номны тухай мартчихаагүй дээрээ цөөхөн зүйл бичье гэж бодлоо.

Мань эр амьдралынхаа хэдэн цагийг уншиж боловсорч, судалж ашигтай зүйлд зарцуулсан гэж бодож байна? Тэр бидний хэлж заншсанаар "зав л гарвал” ном, сонин, сэтгүүл уншиж, мөнгө олох тухай бодож байжээ. Бүр 10 000 хуудастай хөрөнгийн зах дээр бүртгэлтэй компаниудын мэдээллийг агуулсан номыг ихэнх гол хэсгийг цээжилтэл буюу 2 дахин уншсан байдаг. Ямар сайндаа л нурууны өвчтэй, хараа муутай болтлоо суусан байх билээ дээ. /Мань эрийг зах зээл дээр хөрөнгө оруулах шийдвэр хэрхэн гаргадаг тухай сэтгүүлч асуухад "Миний нуруугаар өвдөж эхлэх үед би зарж, эрүүлээр биеэ мэдэрч байх үедээ худалдан авч эхэлдэг” гэж хариулсан байдаг/

Ясаа цайтал хөрөнгө оруулалтын санаанууд судалж, ихээхэн цаг хугацаа зарцуулсны үр дүн!. Гэтэл бид сурах гэж юу хийдэг билээ? Ажиллах гэж юу хийдэг билээ дээ?

Мань эрийн аж амьдарлын гол агуулга нь их багаасаа мөнгө олох тал дээр сонирхолд хөтлөгдөж энэ санаагаа тасралтгүй хөгжүүлсээр ирсэн дэг шүү. Бүр зургаан настай байхдаа бидний хэдэн монголчуудын гудамжинд зараад зогсож байдаг, нэг үе их хэрэглэдэг байсан Wrigles-н бохинуудыг зараад явж байсан байх юм. Бидний аль нэгний маань хүүхэд ингэж сэтгэх болов уу, та бүхэн юу гэж бодож байна? Тэгэхээр суутнууд багаасаа төрдөг байх нь гэж бодлоо.

Уоррен Эдуард Баффетт бага наснаас авахуулаад хэрхэн өөрийнхөөрөө сэтгэж, яаж хөрөнгө оруулалтанд хандахыг сурсан байна. Ингэж төлөвшихөд Бэнжамин Грахамын /Benjamin Garaham/ "Ухаалаг Хөрөнгө Оруулагч”, "Хувьцааны Шинжилгээ” зэрэг номнууд голлох үүрэг гүйцэтгэсэн. Тэрээр энэ номуудыг хэд дахин, бүр хэд дахин уншиж, бараг цээжилжээ. Цаашид тэрээр номын зохиогчоос зохион байгуулдаг хөрөнгө оруулалтын дамжаанд явсан, тухайн үедээ шилдэг нь гэгддэг байсан Бэнжамин Грамаас суралцсанаар цаашдын амьдралын зам нь дурайжээ. Энэ бол 1950 –иад оны үеийн Америк байлаа. Бэнжамины авьяас чадварыг олон хүн мэддэг үнэлдэг байгаад түүнийг тэтгэвэртээ суух үед нь Бэнжамины партнершипд /partnership-манай ойлголтоор хадгаламж зээлийн хоршоотой төстэй, үйл ажиллагаа нь хөрөнгө оруулалтанд чиглэсэн бүлэг хүмүүсийн нэгдэл / байсан хөрөнгө оруулалтын ихэнхийг Баффет үргэлжлүүлэх болжээ. Өөрөөр хэлбэл мөнгөтэй хүмүүсийн тойрогт орж, "Бусдын мөнгийг ашиглах” зарчмыг хэлбэрэлтгүй хэрэгжүүлж ирсэн байна.

Цаашид тэрээр Buffett Partners компанийг байгуулж, Berkshire Hathway компанийг худалдан авч, (Coca Cola, American Express, ... бидний өдөрт тутам бүтээгдэхүүнийг нь хэрэглэж байдаг олон олон компаниуд) компанид хөрөнгө оруулж, олон арван хөрөнгө оруулалтын боломжуудыг ашигласнаар өнөөгийн тэрбумтан, манай гарагийн гуравдугаар баян нь болжээ.

Баффеттын ажиллаж ирсэн зарчим нь хямдхан хувьцааг аваад, түргэн хугацаанд үнэ хүргэж зарна гэж үздэг техник арилжаанаас илүүтэй улс орондоо урт хугацаанд ашиг тусаа өгөхүйц суурь хөрөнгө оруулалтанд чиглэсэн, хэзээд үнэ цэнээ алдахааргүй, эдийн засаг, зах зээлийн хямралд үүдээ барьчихгүй тийм бизнесийн байгууллагуудад хөрөнгө оруулалт хийж ирсэн байдаг.

Гэтэл бидний хэдэн Монголчуудын сэтгэлгээ ямар төвшинд байгаа билээ? Хөрөнгө оруулалт гэдгийг бид арай өөрөөр ойлгоод байх шиг.

Дагвадоржийн Орхон