 | |
Тансаг гар утас үйлдвэрлэгч "Vertu" дампуурлаа зарлана
Их Британид төвлөдөг тансаг зэрэглэлийн гар утас үйлдвэрлэгч "Vertu" компанийн санхүүгийн алдагдлаа нөхөх төлөвлөгөө нурсны улмаас дампуурлаа зарлахад хүрчээ.
"Vertu" компани ойролцоогоор 128 сая фунт стерлингийн санхүүгийн алдагдал хүлээж, улмаар 200 гаруй ажиллагсдаа алдсан гэх мэдээлэл ирсэн аж. Мөн зах зээлд илүү чамин хээнцэр материалаар хийсэн гар утас нийлүүлэх өрсөлдөгчидтэй нүүр тулсан нь "Vertu"-д хүндхэн туссан гэж салбарын шинжээчид тайлбарласан байна.
"Vertu"-ийн "Signature" загварын гар утас 11 мянган фунт стерлинг, 18 каратын улаан алтаар чимэглэсэн гар утас нь 40 орчим мянган фунт стерлингээр худалдаалагдаж буй.
Гар утас нь өндөр үнэтэйгээс гадна бүтээгдэхүүнээ маш бага тоогоор зах зээлд нийлүүлдэг ийм тохиолдол ховор гэдгийг "IHS Technology”-ийн шинжээчид онцолжээ. "Apple” компани л гэхэд "iPhone” гар утасныхаа дэлгэцийг "Vertu" брэндийнх шиг "нийлэг индранил"-аар хийхийг оролдож байсан ч үйлдвэрлэлийн шатанд асуудал үүсэж, маш их ажиллагаа шаардаж байсан учраас төлөвлөгөөнөөсөө татгалзсан байна.
"Vertu" компанийг анх 1998 онд "Nokia" компани байгуулсан бөгөөд 2012 онд худалджээ. Тус компани тухайн үед "Nokia"-ийн "Symbian" үйлдлийн системээс "Google”-ийн "Android" систем рүү шилжиж байлаа.
