 | |
Их дээд сургуулийн захирлаар салбартаа хүлээн зөвшөөрөгдсөн хүмүүсийг томилж эхлэв үү
Улс орны боловсролын салбар нь тухайн улсын хөгжлийн бодлогыг тодорхойлдог гэдэг. Харин манай улсын хувьд байгалийн баялагт тулгуурласан уул уурхайн бодлогыг эн тэргүүнд тавьж, Боловсролын салбарын бодлогоо олон жил орхигдуулж ирсэн.
Боловсролын салбарын бодлогыг орхигдуулсны нөлөөгөөр энэ салбар үнэгүйдэж, дунд сургуулийн боловсролын стандартад элдэв чамин нэртэй хөтөлбөрүүд хэрэгждэг байсан нь саяхан. Мөн Их дээд сургуулийн диплом үнэгүйдэж, тухайн мэргэжлийн үнэ цэнэ уналатанд орж, эцэст нь оюутан суралцагчид хохирдог явдал нэг бус удаа гарч байсан.
Тэгвэл 2016 оны УИХ-ын сонгуулиар байгуулагдсан Мэргэжлийн засгийн газар боловсролын системд ихээхэн анхаарч ажиллаж байгаа нь сайшаалтай. Юуны өмнө төрийн өмчийн Их дээд сургуулийг хувьчилж, тэднийг бизнесийн байгууллага болгох шахсан өмнөх эрх баригчдын харалган шийдвэрийг зогсоосон нь энэ салбарт ажиллаж байгаа олон мянган багш ажилчид, оюутан суралцагчдын талархалыг хүлээсэн.
Төрөөс дээд боловсролын бодлого шинэчлэлт хийж, мэргэжилдээ эзэн байх боловсон хүчнийг бэлтгэхэд анхаарч ажиллахаар болж, энэ шинэчлэлтийнг хэрэгжүүлэх ажлын хүрээнд төрийн өмчийн Их дээд сургуулийн захирлуудыг сольж эхлээд байна.
Засгийн газар, салбарын яамны зүгээс хэрэгжүүлж байгаа дээд боловсролын бодлогыг тухайн сургуульд хэрэгжүүлж чадах салбарын өндөр мэдлэгтэй, мэргэжлийн ур чадвартай боловсон хүчнийг салбарын сайдын зүгээс Их дээд сургуулийн захирлаар томилох биз гэсэн хүлээлт олны дунд байсаар байгаа нь нууц биш.
Тэгвэл БСШУС-ын сайд Ж.Батсуурь саяхан МУИС-ийн захирлаар Я.Төмөрбаатарыг томилжээ. Я.Төмөрбаатарын хувьд өмнө нь БСШУ-ны дэд сайдаар ажиллаж байсан, боловсролын салбарын тулгамсан асуудал, зовлон жаргалыг сайн мэдэх нэгэн юм. Я.Төмөрбаатарыг МУИС-ийн захирлаар томилсонд энэ салбарт ажилладаг багш, оюутнууд хүн ам сайтай байна.
БСШУС-ын сайдын зүгээс удахгүй СУИС, АШУҮИС тэргүүтэй их дээд сургуулийн захирлыг томилох биз.
Ямартай ч Монголын боловсролын салбарт тэргүүлж, олон арван мянган сэхээтэн бэлтгэдэг их дээд сургуулийн удирдлагаар салбартаа хүлээн зөвшөөрөгдсөн, салбарынхаа тулгамдсан асуудлыг сайн мэддэг, Мэргэжлийн засгийн газрын бодлого, мөрийн хөтөлбөрийг хэрэгжүүлэн ажиллаж чадах чадварлаг боловсон хүчнийг томилж, дээд боловсролын салбарын өмнө тулгамдсан олон асуудлыг шийдвэрлэн ажиллана гэдгийг олон нийт итгэх л үлдлээ.
А.Галт
