 | |
Тутанхамун солироор хийсэн хутгатай байсан гэнэ
Египетийн аугаа хаадуудаас хамгийн нууцлаг түүхтэй, үхлийн шалтгаан нь ч өнөөдрийг хүртэл эрдэмтдийн хооронд маргаан дэгдээдэг хэвээрээ байгаа хаан бол яах аргагүй өсвөр насандаа хорвоогоос хальсан Тутанхамун юм. Археологичид түүний бунхнаас олдсон эд зүйлсийг судалж байгаад нэгэн гайхмаар нээлтийг хийсэн талаар trendingpost.com цахим хуудас мэдээлэв. Учир нь өдгөөгөөс 3000 гаруй жилийн өмнө амьдарч байсан өсвөр насны хаан солирын металаар хийсэн алтан хуйв бүхий хутгатай байсан нь ийн эрдэмтдийн анхаарлыг татаад байна.
Залуу хаан Тутанхамуны бунханг хамгийн анх 1922 онд археологич Ховард Картер олж нээснээс хойш олон арван гайхам түүхийн эх сурвалжийг олсон юм. Харин тухайн үед нэг их тоолгүй орхигдоод байсан алтан хуйвт чинжаал хутгын материалыг судалж үзэхэд хутгыг хийсэн метал нь төмөр, кобальт, никелийн хольцтой байсныг Солир, дэлхий гаргийг судлах ухааны сэтгүүлд онцолжээ. Тодруулбал, уг материалын 11 хувийг никель дангаар эзэлж байгаа нь гадаад сансраас дэлхийд унасан солир гэдгийг баталж байгаа юм байна. Тухайн үед метал боловсруулах ухаан төдийлөн хөгжөөгүй байсан учир зэр зэвсэг хийхэд ашигласан металийн ердөө дөрөвхөн хувийг нь никель эзэлдэг байсан гэнэ.
Судлаачид солирыг лавшруулан судлахад Тутанхамуны бунхан орших бүсэд 2000 км-ийн радиуст хайгуул хийхэд солирын найрлага бүхий харгах гэдэг метал материал байдгийг олж мэдсэн байна. Харин судалгааг улам лавшруулахад тэрхүү материалыг 2000 онд эртний Александриа хотын тууриас холгүй орших Мерса Матрух хэмээх газраас солирын үлдэгдлийг олсон байгаа юм. Эрдэмтэд энэ бүгдийг нэгтгэж үзээд эртний Египетчүүд метал урлалын тал дээр маш өндөр хөгжсөн байсан гэх дүгнэлтэд хүрч бидний мэдэх түүх арай өөрөөр эргэж болохыг санууллаа.
С.Дамдин
