 | |
Д.Пүрэвдаваа: Би нэр төрөө сэргээлгэхийн тулд шүүхэд хандана
Нийслэлийн Баянзүрх дүүргийн засаг дарга Д.Пүрэвдаваа жирэмсэн эмэгтэйг зодсон талаархи мэдээлэл сүүлийн үед нилээн тархсан. Тэгвэл энэ талаар дүүргийн удирдлагууд өнөөдөр мэдэгдэл хийлээ.
Нийслэлийн Баянзүрх дүүргийн засаг дарга Д.Пүрэвдаваа:
"Би Н.Эрдэнэ гэдэг хүнийг гэрээгээр хүлээсэн үүрэг хангалтгүй биелүүлсэн албаны чиг үүргээ хэрэгжүүлж чадаагүй, удирдах албан тушаалтны ёс зүйн хэм хэмжээг зөрчсөн зэрэг шалтганаар албан тушаал бууруулж ахлах мэргэжилтэн болгосон болохоос ажлаас нь халаагүй. Түүнчлэн миний хувьд энэ эмэгтэйн үйл ажиллагаанд тусалсан уу гэхээс эс үйлдэл гаргаж үзээгүй гэдгийг албан ёсоор хэлье.
Гэдэс рүү нь цохьсон, хана мөргүүлсэн гэх зэрэг мэдээллүүд худлаа. Элдвээр хэлж доромжилсон юм ч байхгүй. Би амьдралдаа эмэгтэй хүнд гар хүрч үзээгүй. Би өөрөө охин дүүтэй бас гурван хүүхэдтэй, эхнэр маань таван сард амаржина. Гэр бүлийнхэнд маань энэ мэдээ хамгийн хүнд тусч байгаа. Миний хувьд туйлийн харамсалтай байна.
Энэ үйл явдал нэгдүгээр сарын 28-ны өдөр болсон. Би энэ өдөр дүүргийнхээ иргэдийг хүлээн авч уулзсаны дараа Гэр бүл хөгжлийн төвийн дарга байсан Н.Эрдэнэ, Дөрөвдүгээр хорооны засаг дарга Оюунтуяа нар над руу хэл амаараа доромжилж халдсан. Энэ нь хяналтын камерт тодорхой харагдаж байгаа. Түүнчлэн энэ хүн яагаад цагаан сарын өмнө энэ асуудлыг яриагүй юм. Яагаад гэнэт одоо энийг сөхөж хэвлэл мэдээллээр яриад байгаа юм бэ гэдэг их сонин байна” гэлээ.
Засаг дарга Д.Пүрэвдаваа хэвлэл мэдээллийн хэрэгслээр нэр хүндэд нь илтэд хууль бусаар, зохион байгуулалттайгаар халдаж байгаад харамсаж байгаагаа илэрхийлсэн бөгөөд энэ талаар хууль шүүхийн байгууллагад хандахаа албан ёсоор мэдэгдлээ.
