 | |
Хүүхдүүд хутга тулгаж, автомашин дээрэмджээ
Автобусны буудлын орчимд зэвсэг хэрэглэн автомашин дээрэмдсэн ноцтой хэрэг энэ оны дөрөвдүгээр сарын 16-ны өглөөний 05:00 цагийн орчимд цагдаагийн байгууллагад бүртгэгджээ. Тодруулбал, хяналт шалгалтын явцад 15-18 насны хүүхдүүд бүлэглэн, бусдад хутга тулган заналхийлж, "Toyota Aqua" маркийн автомашиныг дээрэмдсэн болох нь тогтоогдсон байна. Цагдаагийн байгууллагын шуурхай эрэн сурвалжлах ажиллагааны үр дүнд сэжигтэн этгээдүүдийг саатуулан, одоогоор мөрдөн шалгах ажиллагааг үргэлжлүүлэн явуулж байгаа аж. Сүүлийн үед энэ төрлийн хүнд гэмт хэрэг өсвөр насныхны дунд үйлдэгдэх хандлага ажиглагдаж байгааг цагдаагийн байгууллагаас онцгойлон анхаарууллаа.
Иймд эцэг эх, асран хамгаалагчд хүүхдийнхээ хэнтэй нөхөрлөж буйд анхаарал тавих, чөлөөт цагаа хаана, хэрхэн өнгөрүүлж байгаад хяналтаа сайжруулах болон гэмт хэрэг, зөрчлөөс урьдчилан сэргийлэх зөвлөгөөг тогтмол өгч байхыг зөвлөж байна.
