 | |
“Атар-Өргөө” ХК хэрэглэгчдийг үл тоомсорлож байна
Атар-Өргөө ХК нь ард түмний өдөр бүр хүнсэндээ хэрэглэдэг алдарт "Атар” талхны тодорхой хувийг үйлдвэрлэн худалдаанд гаргадаг билээ. Гэвч хүнсний чиглэлээр үйл ажиллагаа явуулдаг ууган компанид МУ-ын хууль, стандартын шаардлага үйлчилдэггүй юу? эсвэл үйлдвэрлэж буй талхныхаа хэмжээ, жинг мэддэггүй юу? гэсэн асуулт урган гарч ирж байгаа юм. Тодруулбал МУ-д хүчин төгөлдөр мөрдөгдөж буй Талх, талхан бүтээгдэхүүнд тавигдах Техникийн ерөнхий шаардлага MNS 4661 : 2009 – д заасан хэд хэдэн зөрчил тус үйлдвэрийн үйлдвэрлэдэг "Атар” талхны савлагаан дээрх шошгыг харахад л ажиглагдаж байгаа юм.
Тус стандартад зааснаар барааны тэмдэг ба үйлдвэрлэгчийн нэр хаяг, бүтээгдэхүүний нэр, ангилал, цэвэр жин, үйлдвэрлэсэн он, сар, өдөр, найрлага, илчлэг чанар, хадгалах хугацаа, хадгалах нөхцөл, стандартын дугаар, тэмдэглэгээг зэргийг тэмдэглэсэн мэдээллийг агуулсан шошготой байна гээд тодорхой зааж өгсөн байдаг байна. Энгийн иргэд бидний хувьд ямар нэг хүнсний бүтээгдэхүүн худалдан авахдаа хамгийн түрүүнд үйлдвэрлэсэн он, сар, өдөр, хадгалах хугацааг харж авдаг билээ. Атар талхны хувьд хүүхэд байхаас л идэж өссөн итгэлтэй, идүүртэй хүнс учир тэр бүр хадгалах хугацааг анзаардаггүй байж болох юм. Гэвч дээрх стандарт шаардлагад заасан ноцтой гэж хэлж болохоор нэг зөрчил нь бүтээгдэхүүний хадгалах хугацааг дээрх стандартад заагдсан хадгалах хугацаанаас хэтрүүлэн бүтээгдэхүүнийхээ шошгод тэмэглэж өгсөн нь иргэдийг хардлага төрүүлэхэд хүргэж байгаа юм. Учир нь талхны жин, хэмжээнээс хамааран хадгалах хугацааны хувьд тавигдах шаардлага нь өөр өөр байдаг болохыг мэргэжлийн хүмүүс хэлж байгаа юм.
Тус стандартад тодорхойлсоноор хэмжээний хувьд нэг ширхэг бүтээгдэхүүн нь 0,4 кг ба түүнээс дээш жинтэй байвал ТОМ талх, харин нэг ширхэг бүтээгдэхүүн нь 0,05-0,4 кг хүртэл жинтэй байвал ЖИЖИГ талх байна гэж нэр томьёоны хувьд тодорхойлжээ. Дээрх тодорхойлолтын дагуу бол "Атар” талх нь 0,4 кг-аас илүү жинтэй буюу Атар-Өргөө ХК-ийн үйлдвэрлэн худалдаанд гаргадаг "Атар” талхны шошгон дээрх тэмдэглэгээнээс үзвэл 600 гр байгаа нь ТОМ талх гэж тооцогдохоор байгаа тодорхой юм. Тэгвэл ТОМ талхны хадгалах дээд хугацаа нь 24-48 цаг, ЖИЖИГ талхны хувьд хадгалах дээд хугацаа нь 72 цаг байна гээд заасан байгаагаас харвал "Атар Өргөө” ХК-ийн "Атар” талх нь өнөөдрийг хүртэл стандартын биш хадгалах горим зөрчсөн бүтээгдэхүүн үйлдвэрлэж ард түмнийг хохироож байгаа нь хууль стандартын хэрэгжилтийг хэрхэн үл тоомсорлож байгаагийн бас нэгэн жишээ юм.
Тиймээс цаашид Мэргэжлийн хяналт нь хяналтаа тавьсан шиг тавьж иймэрхүү энгийн хүмүүсийн анзаардаггүй хууль бус асуудалд анхаарал хандуулж ажиллах цаг нь болжээ.
Эх сурвалж: Шуурхай.мн
