МИАТ-ын тоног төхөөрөмжийн 60 хувийг нүүлгэн шилжүүлээд байна. ИНЕГ-ын дарга энэ оны 5 дугаар сарын 27-нд тушаал гарган Буянт-Ухаагаас шинэ нисэх буудал руу "Нүүлгэн шилжүүлэх удирдлагын төвийг"-ийг 34 хүний бүрэлдэхүүнтэй байгуулаад байна. Тус төвийн гишүүд 6 дугаар сарын 2-ноос "Чингис хаан” олон улсын нисэх буудалд байрлан "Буянт-Ухаа” олон улсын нисэх буудлын нислэг үйлдвэрлэлийн үйл ажиллагааг нүүлгэн шилжүүлэх нарийвчилсан төлөвлөгөө гарган ажиллаж байна.
Уг үйл ажиллагаатай ЗТХЯ-ны төрийн нарийн бичгийн дарга С.Батболд өнөөдөр газар дээр нь танилцаж, "Чингис хаан” олон улсын нисэх буудлын үйл ажиллагааг эхлүүлэх бэлтгэл, нүүлгэн шилжүүлэлтийн ажлын явцыг шалгав. "Чингис хаан” олон улсын нисэх буудлын үйл ажиллагааг эхлүүлэх бэлтгэл ажлыг хангах нэгдсэн төлөвлөгөөг шинэчлэн боловсруулж, өнгөрсөн 4 дүгээр сард ЗТХ-ийн сайдаар батлуулсан юм. Үүний дагуу ИНЕГ-аас хэрэгжүүлэх 72, "Нью Улаанбаатар Интернейшнл Эйрпорт” ХХК-иас хэрэгжүүлэх 69 ажлын гүйцэтгэл өнөөдрийн байдлаар 93 хувьтай байгааг "Чингис хаан” ОУНБ-ын үйл ажиллагааны бэлэн байдлыг хангах, "Буянт-Ухаа” ОУНБ-ын нислэг үйлдвэрлэлийн үйл ажиллагааг нүүлгэн шилжүүлэх ажлыг удирдан зохион байгуулах ажлын хэсгийн ахлагч, ИНЕГ-ын дэд дарга Б.Алтанцом танилцууллаа.
