 | |
Согтууруулах ундаа хэрэглэсэн үедээ голын усанд унаж осолджээ
Төв аймгийн Мөнгөнморьт суманд тавдугаар сарын 22-ны 17:00 цагийн орчим 62 настай иргэн согтууруулах ундаа хэрэглэсэн үедээ голын усанд унаж осолджээ.
Тодруулбал, "Байдлаг” голын эрэг дээр дөрвөн иргэн автомашиндаа согтууруулах ундааны зүйл хэрэглэсэн бөгөөд энэ үеэр иргэн С голын усанд унажээ. Энэ тухай дуудлага сумын Онцгой байдлын газар тухайн өдрийн 18:00 цагийн орчимд ирсэн байна.
Улмаар тус аймгийн Онцгой байдлын газрын Гал түймэр унтраах, аврах 75 дугаар анги, Цагдаагийн хэсгийн алба хаагчид 30 км замыг туулан 19:28 цагт очиж, эрэн хайх ажиллагааг зохион байгуулж, мөн өдрийн 20:28 цагт нийслэлийн Сонгинохайрхан дүүргийн харьяат иргэн С /62 настай, эрэгтэй/-ын цогцсыг осолдсон газраас зургаан метрийн зайд "Байдлаг” голын уснаас олж, Цагдаагийн байгууллагад шилжүүлэн өгсөн байна.
