 | |
Юанийн ам.доллартой харьцах ханшийг огцом сулрууллаа
Лхагва гарагт Хятадын Төв банк нэг ам.доллартой харьцах юанийн дундаж ханшийг 6.8365 болгосон бөгөөд энэ нь нэг өдрийн өмнөх 6.7954 юаниас 411 пунктээр суларсан ханш аж.
Хятадын үндэсний валютын ханш он гарснаас хойш ихээхэн суларсан юм. Валютын ханшийг оновчтой, тогтвортой түвшинд байлгана гэж Хятадын Төв банк мэдэгдэж байв. Түүнчлэн юанийн ханшийг худалдааны маргааныг зохицуулах хэрэгсэл болгон хувиргах гээгүй гэж тус улсын Төрийн зөвлөлийн Ерөнхий сайд Ли Көцян нэг бус удаа мэдэгджээ.
Блүүмберг агентлаг урьд нь эх сурвалжийнхаа мэдээллээс иш татан уламжлахдаа, АНУ-ын төлөөлөгчид БНХАУ-тай худалдааны асуудлаар хэлэлцээ хийхдээ юанийн ханшийг тогтвортой байлгахыг Бээжингээс хүссэн бөгөөд энэ асуудлыг хэлэлцээний хэд хэдэн үе шатанд хөндсөн гэжээ. Юанийн ханшийг сулруулах аливаа оролдлогод илүү өндөр тарифуудаар хариу барих болно гэж АНУ мэдэгдсэн байна. Юанийн ханшийг сулруулж байгаа нь Хятадын импортын бараанд ногдуулсан Америкийн татварын эсрэг чиглэсэн стратеги байж магадгүй гэж Блүүмберг агентлаг мэдээлжээ.
Хятадын Ардын банк 2015 оны наймдугаар сард юанийн нэг ам.доллартой харьцах ханшийг 6.2-оос шууд 3 хувиар огцом сулруулж 6.4 болгосон нь дэлхийн хөрөнгийн зах зээлд нөлөөлж байв. Хожим нь Хятадын Төв банк юанийн ханшийг тогтворжуулахын тулд хүчин чармайлт гаргасан байна. Үүний дараа Хятадын валютын ханшийг гурван ч удаа сулруулсан юм. Эхний удаагийнхыг Хятадын Төв банк экспортын өсөлтийг дэмжихийн тулд ханшийг зориудаар унагасан гэж шинжээчид мэдэгдэж байжээ. Харин Хятадын эрх баригчид үүнийг няцаасан мэдэгдэл хийж байв.
montsame.mn
