 | |
Ерөнхийлөгчийн цомын нэрэмжит барилдаан Буянт-Ухаа цогцолборт болно
Монгол Улсын Ерөнхийлөгчийн цомын нэрэмжит чансаа өндөр бөхийн барилдаан 2018 оны арванхоёрдугаар сарын 29-нд Буянт-Ухаа спорт цогцолборт болно. Хэдийгээр маргалдагч талууд буюу Дархан аварга Х.Баянмөнх, Б.Бат-Эрдэнэ нар эв зүйгээ олсон тул Бөхийн өргөөнд болно гэж зарим хэвлэлээр мэдээлж байгаа ч энэ нь боломжгүй аж.
Учир нь Бөхийн өргөөг прокурорын шийдвэрээр БЗД-ийн цагдаагийн хоёрдугаар хэлтсээс битүүмжлэн, үйл ажиллагаа явуулахыг хориглоод байгаа. Тиймээс эв зүйгээ олсон талууд прокурорт хүсэлт гаргаж, прокурор хүсэлтийг хүлээн авсан цагт Бөхийн өргөөг нээх боломжтой юм байна. Прокуророос нээх шийдвэр гараагүй цагт Бөхийн өргөө битүүмжлэгдсэн хэвээрээ байна.
Нэгэнт Бөхийн өргөө нээгдээгүй байгаа тул Ерөнхийлөгчийн Тамгын Газар Ерөнхийлөгчийн цомын нэрэмжит чансаа өндөр 128 бөхийн барилдааныг Буянт-Ухаад зохион байгуулахаар шийдвэрлэсэн аж. Өнгөрсөн жил уг цомын эзнээр Увс аймгийн Тэс сумын уугуул, Үндэсний Батлан хамгаалахын их сургууль, 'Увс нуур' дэвжээний бөх, Монгол Улсын харцага Төрөөгийн Баасанхүү тодорч байжээ.
Ч.Амар
