 | |
“ОЮУНЫ УНДРАА” ГРУППЭЭС АЛБАН ЁСООР УУЧЛАЛТ ХҮСЛЭЭ
Манай сайтад "Оюуны ундраа” групп болон
түүний үүсгэн байгуулагчид болох С.Отгонбаяр, С.Амарсайхан нарын нэр
төрийг гутаасан цуврал нийтлэлүүд олон сарын турш удаа дараалан
тавигдсан билээ. Ингэхдээ мэдээллийн эх сурвалжийг зөвхөн нэг талын эх
сурвалж буюу Транс Банкны гэх Д.Энхтайваны бэлтгэсэн худал гүтгэлэгт
үндэслэн нийтэлж улмаар С.Отгонбаяр, С.Амарсайхан нарыг "төрийн өмчийг үнэгүйдүүлэгч, дээрэмчин, цагаан захтай луйварчин, Рейдерүүд” гэх зэргээр гүтгэн доромжилж, тэдний бизнесийн болон хувийн нэр хүндэд
нь хохирол учруулж, сэв суулгасандаа албан ёсоор хүлцэл өчин энэхүү
залруулгыг гаргаж байна.
Учир нь Транс Банкны гэх Д.Энхтайван, Авилгатай Тэмцэх Сэтгүүлчдийн Клубын Тэргүүн, Сэтгүүлч Б.Отгонбаяр нар нь манай сайтад нийтлэгдсэн захиалгат гүтгэлэгээ үнэн мэт олон нийтэд харагдуулах зорилгоор "Оюуны ундраа” группийн хууль бус үйлдэлийг шалгаж, хуулийн хариуцлага тооцуулах гомдлыг Монгол Улсын Ерөнхийлөгч Ц.Элбэгдорж, Хууль Зүйн сайд болон УИХ ын гишүүдэд хүргүүлснийг нь шат шатны хууль, хяналтын байгууллагууд шалгаад "Оюуны ундраа” группийг хууль бус үйл ажиллагаа явуулаагүй болохыг тогтоосон байна.
Иймд хуулийн хүрээнд үйл ажиллагаа явуулдаг "Оюуны ундраа” групп болоод түүний үүсгэн байгуулагчдыг хууль бус үйлдэл хийдэг мэтээр олон нийтэд үндэслэлгүй түгээсэн мэдээллүүд нь гагцхүү нэг талын буюу Д.Энхтайваны гүтгэлгэ захиалгад үндэслэсэн болохыг дахин нотлохын зэрэгцээ нэр төрд нь бүдүүлгээр халдсандаа "Оюуны ундраа” группийн хамт олон болон С.Отгонбаяр, С.Амарсайхан нараас Өглөө.мн сайт албан ёсоор хүлцэл өчин, уучлалт хүсч байна.
Мөн "Оюуны ундраа” групптэй холбоотой гүтгэлэгийн шинжтэй нийтлэл мэдээллийг манай сайтаас авч тавьсан бусад сайтууд, сонин хэвлэлүүд уг мэдээллүүдийг сонин сайтаасаа татахыг хүсье.
Өглөө.мн сайт
