 | |
Шивээхүрэн-Сэхээ боомтыг нээв
Монгол, БНХАУ-ын Шивээхүрэн-Сэхээ боомтын үйл ажиллагаа өнөөдрөөс эхэлсэн гэдгийг Гадаад харилцааны яамнаас мэдээлэв. Ингэснээр тус боомтоор уул уурхайн бүтээгдэхүүн, ялангуяа нүүрсийг чингэлэг тээврийн горимоор тээвэрлэх боломж бүрдэж байгаа аж.
БНХАУ-ын ӨМӨЗО-ны Альшаа аймгийн Эзнээ хошуунд коронавирусний анхны тохиолдол бүртгэгдсэний улмаас хятадын талын саналаар 2021 оны 10 дугаар сарын 16-наас тус боомтын үйл ажиллагааг бүрэн зогсоосон. Хятадын талаас цар тахал хил дамнан халдварлахаас урьдчилан сэргийлэх, халдвар хамгааллын дэглэмийг чанд сахиулах бодлого хэрэгжүүлж, өнгөрсөн хугацаанд Сэхээ боомтод ариутгал, халдваргүйжүүлэлтийн байгууламж байгуулсан байна.
Улмаар Шивээхүрэн-Сэхээ боомтын улсын хилийн дундын бүсэд чингэлэг солилцох талбай байгуулж, уул уурхайн бүтээгдэхүүнийг чингэлэг тээврийн горимоор тээвэрлэхээр дипломат шугамаар тохиролцсоны үндсэн дээр тус боомтын үйл ажиллагааг нээжээ.
