 | |
БНСУ-ын агаарын тээврийн компаниуд их хэмжээний алдагдал хүлээх төлөвтэй байна
СӨҮЛ. /Yonhap/. БНСУ-ын агаарын тээврийн компаниуд шинэ коронавирусний халдварын улмаас их хэмжээний алдагдал хүлээх төлөвтэй байна гэж тус улсын Иргэний агаарын тээврийн холбооноос мэдээлжээ.
"Агаарын тээврийн компаниуд ирэх зургадугаар сар гэхэд 5 их наяд вон буюу 4.2 тэрбум ам.долларын алдагдал хүлээж болзошгүй” гэж уг байгууллагын мэргэжилтнүүд тооцоолжээ. Энэхүү тооцооллыг өнгөрсөн хоёрдугаар сарын дөрөв дэх долоо хоногт БНСУ-ын агаарын тээврийн компаниудаар үйлчлүүлсэн зорчигчдын тоонд үндэслэн гаргасан байна.
Дээр дурдсан хугацаанд 653 мянга орчим аялагч олон улсын чиглэлд зорчсоныг өнгөрсөн оны мөн үетэй харьцуулахад 65.8 хувиар буурсан байна. Зорчигчдын үзүүлэлтийг чиглэлээр авч үзвэл, Хятад руу зорчсон иргэдийн тоо 85.2 хувиар буурсан бол Япон, Зүүн Өмнөд Азийн чиглэлд 70.6, 62.1 хувиар тус тус буурчээ.
БНСУ-ын Өвчинд хяналт тавих, урьдчилан сэргийлэх төвийн мэдээлснээр, даваа гаргийн өглөөний байдлаар коронавирусээр халдварласан хүний тоо 7400 дөхсөн байна. Өнгөрсөн ням гарагт 248 шинэ тохиолдол бүртгэгдсэнээр нийт халдвар авсан хүний тоо 7382 болжээ.
Дэгү хотын сүмийн гишүүдээс шинжилгээ авч дууссантай холбоотойгоор цаашид шинэ халдварын тохиолдлын тоо буурах төлөвтэй байгаа хэдий ч халдварын шинэ голомт үүсэж болзошгүй тул холбогдох албаны төлөөлөгчид өндөржүүлсэн бэлэн байдалд ажилласан хэвээр байна.
