 | |
Африкийн орнуудад усны хомсдол нүүрлэж байна
Мозамбик, Зимбабве зэрэг Африкийн орнуудад усны хомсдол нүүрлэж байна. Нэгдсэн Үндэсний Байгууллагын Дэлхийн усны хөгжлийн тайланд дурдсанаар усны хэрэглээ жилд нэг хувиар нэмэгдэж, дэлхий даяар хоёр тэрбум хүн усны хомсдолтой орнуудад амьдарч байгаа ажээ.
Ялангуяа Африк тивд нөхцөл байдал хамгийн муу байгааг эрдэмтэд онцоллоо. Дэлхийн хамгийн ядуу буурай гэгддэг Африк тивийн хүн ам 2050 он гэхэд хоёр дахин нэмэгдэж, 2.5 тэрбум хүрэх урьдчилсан тооцоотой байна. Мөн нийт иргэдийн 59 хувь нь хот, суурин газарт амьдрах юм байна. Ингэснээр хүн амын хүнсний хэрэглээг хангахад хөдөө аж ахуйн салбарт их хэмжээний ус шаардагдах төдийгүй ахуйн хэрэглээний усны хэмжээ огцом өсөх ажээ.
Тиймээс Африк тивд дэд бүтцийг сайжруулахад доод тал нь 130 тэрбум ам.доллар шаардлагатай гэж Африкийн Хөгжлийн банк судалгаандаа дурдсан байна. Хэдий тийм боловч энэ ажлыг хийх санхүүжилт байхгүйн улмаас нөхцөл байдал улам дордож магадгүй байдал үүсжээ.
