 | |
БНСУ-ын хүн амын өсөлт буурсаар байна
Өнгөрсөн онд БНСУ-ын хүн амын өсөлт анх удаа 0.1 хувиас буурсан тухай тус улсын Засгийн газраас даваа гарагт гаргасан тайланд мэдээлэв.
"2018 оны эцсээр БНСУ-ын улсын хүн ам 52 орчим саяд хүрсэн нь өнгөрсөн оны мөн үетэй харьцуулахад 0.09 хувиар өссөн үзүүлэлт боллоо” гэж Дотоод хэрэг, аюулгүй байдлын яамны тайланд мэдээлсэн байна. Тус яам нь 2008 оноос эхлэн энэ төрлийн статистик мэдээг олон нийтэд танилцуулж эхэлсэн бөгөөд үүнээс хойших хамгийн бага өсөлттэй жилээр 2018 он бичигджээ.
Мөн тус улсын голч нас анх удаа 42 насыг давж, 42.1 хүрсэн нь хүн амын насжилт аажмаар нэмэгдэж буйг харуулжээ. Голч нас нь хүн амын тоог тэнцүү хувааж байгаа насыг хэлдэг. Өөрөөр хэлбэл, тухайн улсын хүн амын тэн хагас нь голч наснаас дээш, үлдсэн хагас нь голч наснаас доош насны хүн ам байна гэсэн үг юм.
БНСУ-ын иргэдийг насны бүлгээр авч үзвэл, 50 гаруй насны хүн ам хамгийн олон буюу 8.6 сая, 40 гаруй насны хүн ам 8.4 сая, 30 гаруй насны хүн ам 7.2 сая, 20 гаруй насны хүн ам 6.8 саяыг тус тус эзэлж байна. Энэхүү үзүүлэлтийг хувиар илэрхийлбэл, 0-14 насны хүн ам нийт хүн амын 12.8 хувийг эзэлж байгаа бол 65-аас дээш насны хүн ам 14.8 хувийг эзэлж байгаа ажээ.
Хүн амын өсөлт 2009 онд 0.47 хувь, 2010 онд 1.49 хувь байсан бөгөөд энэ үеэс хойш аажмаар буурсаар 2017 онд 0.16 хувьд хүрсэн байна.
