 | |
Газрын тосны бүтээгдэхүүн импортлогч аж ахуйн нэгжүүдэд ХЭБЭА-н сургалтыг зохион байгууллаа
ХНХЯ-ны харьяа Хөдөлмөрийн аюулгүй байдал, Эрүүл мэндийн төв нь өдгөө түүхт 50 жилийн ойтойгоо золгож байна. Тус төвийн хамт олон түүхт ойн баяраа угтаж "50 бүтээлч ажил” аяныг өрнүүлж байгаа аж. Энэхүү аяны хүрээнд өндөр эрсдэлтэй салбаруудад ажиллаж буй ажиллагсадыг үйлдвэрлэлийн осол, хурц хордлого, мэргэжлээс шалтгаалсан өвчин, гэнэтийн эрсдлээс урьдчилан сэргийлэх сургалт сурталчилгааг эрчимтэй явуулж эхэлжээ. Өнгөрөгч долоо хоногт ХАБЭМТөв Нийслэлийн онцгой байдлын газрын харьяа Нийслэлийн иргэдийг гамшгаас хамгаалах сургалт арга зүйн төвтэй хамтран "Газрын тосны бүтээгдэхүүн импортлогч аж ахуйн нэгжүүдэд хөдөлмөрийн аюулгүй байдал, эрүүл ахуй, гамшгийн үед авах арга хэмжээ” сэдэвт сургалтыг зохион байгуулсан байна. Сургалтад Улаанбаатар хотод үйл ажиллагаа явуулж буй газрын тосны бүтээгдэхүүн импортлогч 11 аж ахуйн нэгж байгууллагын 73 ажилтан хамрагджээ. Энэ үеэр газрын тосны бүтээгдэхүүнтэй харьцан ажиллагсадын хөдөлмөрийн аюулгүй байдал, эрүүл ахуй, газрын тосны бүтээгдэхүүний хордлого, объектийн гал түймрийн үед утаат орчинд өөрийгөө болон бусдыг хэрхэн аврах, эмнэлгийн анхан шатны тусламж үйлчилгээг хэрхэн үзүүлэх, галын төрөл, галын хорыг ашиглах, галын аюулаас урьдчилан сэргийлэх, газар хөдлөлтийн 4-8 баллын бүх төрлийн чичирхийллийн үед өөрийгөө болон бусдыг авран хамгаалах талаархи мэдлэгийг тусгайлан тохижуулсан анги танхимуудад бодитоор үзүүлсэн нь оролцогсдын сонирхолыг татсан сургалт болж чадсан байна.
