 | |
Х.БАТТУЛГА: СКАУТУУД ЗОРИЛГО ТЭМҮҮЛЭЛТЭЙ БИЕ ХҮН БОЛЖ ТӨЛӨВШДӨГ
Скаутын Ази, Номхон далайн бүсийн 31 дүгээр Жембори буюу майхант зуслан Олон улсын хүүхдийн "Найрамдал” цогцолборт үргэлжилж байна. Тус Жемборид 40 орны 2000 скаут, Монголын 21 аймаг, 9 дүүргийн 4000 гаруй скаут, сайн дурын удирдагч нараас бүрдсэн нийт 7500 хүүхэд, залуучууд оролцож байгаа юм.
Уг арга хэмжээнд оролцогчдод хандан Монгол Улсын Ерөнхийлөгч Х.Баттулга өнөөдөр илгээлт явууллаа.
Монгол Улсын Ерөнхийлөгч Х.Баттулгын илгээлтэд:
"Эрхэм хүндэт скаутууд аа,Хүндэт зочид төлөөлөгчид өө,
Ази, Номхон далайн бүсийн 31 дүгээр Жемборид оролцож буй Та бүхний амар мэндийг айлтган мэндчилж, сайны ерөөл өргөн дэвшүүлье.
Монгол Улсад өрнөсөн Ардчилсан хувьсгалын үр нөлөөн дор үүсэн байгуулагдсан Монголын скаутын холбооны 25 жилийн ой- энэ жил тохиож байгаа бөгөөд тус холбоо өнөөдөр 60 мянга гаруй гишүүн, дэмжигчтэй, бүх орон нутагт салбар зөвлөлтэй, Дэлхийн скаутын хөдөлгөөний албан ёсны гишүүн байгууллага болон хөгжиж байна.
Энэ тэмдэглэлт ойн хүрээнд 4 жилд нэг удаа зохион байгуулагддаг Ази, Номхон далайн бүсийн скаутын 31 дүгээр Жемборийг Монгол Улсад анх удаа 2017 оны 7 дугаар сарын 27-ны өдрөөс 8 дугаар сарын 2-ны өдөр Олон Улсын Хүүхдийн "Найрамдал” цогцолборт зохион байгуулж байна.
Уг арга хэмжээнд гадаадын 30 гаруй орны 2 мянга, Монгол Улсын 21 аймаг, нийслэлээс 4 мянга гаруй скаут хүүхэд, залуучууд оролцож байгаа нь Монголын хүүхдийн байгууллагын түүхэнд бичигдэх өргөн цар хүрээтэй арга хэмжээ болж байна. Энэхүү арга хэмжээг санаачлан зохион байгуулж байгаа Монголын скаутын холбоо, түүний мянга мянган гишүүн, дэмжигчдэд халуун баяр хүргэж, амжилт бүтээлийн дээдийг хүсэн ерөөе.
Скаутын байгууллагаар дамжсан хүүхэд- бие даасан, хүнлэг энэрэнгүй, хариуцлагатай, зорилго тэмүүлэлтэй бие хүн болж төлөвшдөг. Энэ нь скаутын хөгжлийн хөтөлбөр, зорилготой холбоотой юм.
Хичээсэн хүн амжилтад хүрдэг. Хүүхэд, залуучууд Та бүхнийг бие биеэсээ ихийг сурч мэдэж, өсөж хөгжинө гэдэгт итгэж байна. Хүүхдийн буян заяа оршсон энэ дагшин газар Та бүхэнд ээл ивээлээ хайрлах болтугай.
Скаутын андгай, дуудлагаар нэгдсэн "Нүүдэлчдийн замаар” уриатай Жемборийн үйл ажиллагаанд амжилт хүсье.
МОНГОЛ УЛСЫН ЕРӨНХИЙЛӨГЧ ХАЛТМААГИЙН БАТТУЛГА” гэжээ.
