Вэб холбоос

Үндэсний шуудан сонин, 2015 оны 3 сарын 2-ны өдрийн 038 (2223) дугаарт Сангийн яамны Төсвийн бодлогын гарын дарга асан, эдийн засагч Б. Батжаргал "Мөнгө дутагдсанаас биш боломжоосоо илүү ихээр зарцуулснаас болж бид хямарсан” гэдэг нэртэй ярилцлага өгчээ. Түүний ярилцлагад нэг ноцтой хэсэг байна. Үүнийг олон нийт анзаарсан болов уу, үгүй л байх гэж бодлоо.
Тэрээр "…Үнэ тогтворжуулах хөтөлбөрөөр хэрэгжүүлж буй арга хэмжээг мөн хуулиараа Засгийн газар хэрэгжүүлэх ёстой боловч бас л зөрчөөд Монголбанк хэрэгжүүлсэн. Ер нь Төв банкнаас сүүлийн гурван жилд улс төрийн шинжтэй, алдаатай арга хэмжээнүүд их авч хэрэгжүүлсэн. Жишээлбэл, Төв банк үнэт цаас гарган дотоод захаас эх үүсвэр татаж, түүгээрээ Хөгжлийн банкаар дамжуулан "Энержи Ресурс”-ын барьсан асфальтан замыг худалдаж авсан. Анхнаасаа л "Энержи Ресурс”-ын замыг авах зорилгоор мөнгө босгосон гэсэн үг. Төв банк түүхэндээ ийм зүйлд хэзээ ч хутгалдаж байгаагүй. Уг нь энэ худалдаж авах эсэх нь Засгийн газрын чиг үүрэг юм. Дараагийн жишээ нь Төв банк "Энержи Ресурс” компанид 200 тэрбум төгрөг, Дарханы хар төмөрлөгийн үйлдвэрийг худалдаж авсан GSC компанид 150 тэрбум төгрөгийн бодлогын зээл олгосон. Энэ нь нэгдүгээрт хуулиараа хориотой зүйл. Гэтэл бодлогын алдаанаас болж үүдсэн төгрөгийн ханшийн уналтын зөрүүнээс үүсч буй төлбөрийг иргэн бид төлж байна” гэжээ.
"Энержи Ресурс” гэдэг маань нөгөө Тавантолгойн ордын Ухаа худаг нэртэй хэсгийг авсан алдартай компани чинь шүү дээ. Эзэн нь МCS болон АПУ, Петровис нарын Кайманы аралд байгуулсан "ММС” компани.
Дээрхи ярилцлагад байгаа мэдээллийн дагуу судалж үзлээ. Энержи Ресурс компани Өмнөговьд барьсан хатуу асфальтан замаа 90 орчим сая доллараар төрд зарсан гэнэ. Нэмээд 200 тэрбумын зээл авсан ажээ. Энэ мөнгийг одоогийн ханшаар тооцоход 100 сая доллар болно. Ингээд нийт 190 сая долларыг Монголбанк уг компанид гаргаж өгсөн байна. Эдийн засагч Б.Батжаргалын хэлснээр бол хуулиараа ийм зүйл хийх нь хориотой гэжээ.
Төвбанк хууль зөрчин Энержи Ресурс компанид 190 сая доллар өгдөг нь юу болж байна аа? Ерөнхийлөгч Золжаргал юу хийгээд байна аа? Үүнээс харахад нээрээ энэ улсад олигархийн засаглал тогтоод төр засаг тэдэнд үйлчилдэг болжээ гэж дүгнэхэд хүргэж байна.
Хамгийн харамсалтай нь энэ 190 сая доллар нь Энержи Ресурс компанийн гадаад төлбөрт гадаад руу шилжсэн. Монголбанкнаас төгрөг аваад зах зээлээс 190 сая доллар аваад гадаад руу шилжүүлжээ гэсэн үг. Өөрөөр хэлбэл, Монгол улсын валютын нөөцөөс 190 сая доллар авчихаж байгаа юм. Үр дүнд нь Монгол улсын валютын нөөц 190 сая доллараар багасч, төгрөгийн ханш унаж, долларын төгрөгийн ханшийн зөрүүг нь ард иргэд төлж байгаа ажээ.
Тус компани алдагдал орж гадаад зээлээ төлж чадахгүй болоод төрийн мөнгөөр төлж байгаа гэсэн нь үнэн боллоо. Үүнээс өөр баталгаа байх уу.
Одоо төрийн Тавантолгой гэдэг нүүрсний ордын 51 хувийг ММС компани авч 1.3 тэрбум доллараа хаах гээд улайран зүтгэж Монгол улсын сайд M.Энхсайхан тэдэнд үйлчилж байгаа юм байна. Монголбанкны Ерөнхийлөгч Золжаргал тэдэнд мөн сайн үйлчилж байна…