 | |
МУИС-ийн захирал А.Галтбаярын “но”-той үйлдэл-3
- Энэ сарын 5-ны өдөр Н.Алтанхуягийн засгийн газар огцорсон.
Үүнтэй зэрэгцэн түүний танилууд эхнээсээ ажлаа өгөх сурагтай байна.
Тэдний нэг нь МУИС-ийн захирал А.Галтбаяр юм. Тэрбээр ажлаа өгөхөөсөө
өмнө хүртээж амжаагүй "бялуугаа” хүртээхээр шийдсэн бололтой МУИС-ийн
Завхан сургуулийг бужигнуулж эхэлжээ. А.Галтбаяр МУИС-ийн дүрмийг
зөрчдөг "уламжлалаа” хадгалсан байна. Ингээд МУИС-ийн Завхан сургуулийг
хэрхэн "самарч” байгааг дэлгэрэнгүйгээр хүргэе.-МУИС нь бүрэлдэхүүний долоон сургуультай. Үүний хоёр нь орон нутагт буюу Завхан, Орхон аймагт сургалтын үйл ажиллагаа явуулдаг. МУИС-ийн орон нутгийн сургуулиуд нь Засгийн газрын 2010 оны 15 тоот тогтоол, БСШУЯ-ны сайдын 2010 оны 07-р сарын 01-ний өдрийн 319 тоот тушаал, МУИС-ийн Удирдах зөвлөлийн 2010 оны 07-р сарын 02-ны өдрийн 10/02 тоот тогтоолоор МУИС-ийн Завхан, Орхон сургууль гэж нэрлэж, бүрэлдэхүүний сургуулийн статустай болсон. Ингэснээр МУИС-ийн Завхан, Орхон сургуулиуд нь өөрсдийн салбар сургуулиудын дүрмийг хүчингүй болгож, МУИС-ийн шинэчилэн баталсан дүрмийг 2011 оноос мөрдөж эхэлсэн байна. Энэ дүрмийн 7.4, 7.5 дахь заалтад Сургуулийн захирал, бүтцийн нэгжийн эрхлэгч бүр гурван жил ажиллаад хамт олонд тайлангаа тавьж үнэлүүлэх талаар тусгасан байдаг. Энэ заалтаа хэрэгжүүлж, МУИС-ийн Завхан сургуулийн бүтцийн эрхлэгч, захирал нар нь тайлангаа тавьж, хамт олноороо үнэлүүлэн, тайланг санал асуулгын дүнгийн хамт МУИС-д хүргүүлсэн байна. Өөрөөр хэлбэл МУИС-ийн дүрмийг зөрчихгүй ажилласаар өнөөдрийг хүрсэн байна. Харин мөрдөгдөж байгаа дүрмийг МУИС-ийн захирал зөрчиж байгаа ажээ. Тодруулбал МУИС-ийн дүрэмд бүрэлдэхүүн сургуулийн захирал нь шинжлэх ухааны тухайн салбараар мэргэшсэн, их, дээд сургууль, эрдэм шинжилгээний байгууллагад таваас доошгүй жил ажилласан Докторын зэрэгтэй хүн байна гэсэн заалттай байхад улс орон даяар өрнөж байгаа улс төрийн үймээн бужигнааг ашиглан хөдөө орон нутагт ажиллаж байгаа сургуулийн эрдмийн зэрэг цолтой захирлаа халжээ. Оронд нь аймаг, суманд улс төрийн албан тушаал хашиж байсан одоогоор эрхэлсэн ажилгүй, эрдмийн зэрэг цолгүй С.Ганчимэг гэх эмэгтэйг томилохоор шийдвэр гаргасан байна.
Халж, сольж болно, харин дүрэм журмаа барих хэрэгтэй шүү дээ А.Галтбаяр захирал. Хамгийн сонирхолтой нь МУИС-ийн Завхан сургуулийн захиралаар ажиллах гээд байгаа докторын зэрэггүй С.Ганчимэг гэгч нь 10 жилийн өмнө энэ сургуульд багш, дэд захиралаар ажиллаж байхдаа диплом зардаг, дипломын дүн засдаг, багш сонгон шалгаруулж авахдаа хээл, хахууль авдаг гэх мэтээр Завхан аймагт байхгүй жишиг тогтоож, хээл, хахуульд гаршсан нэгэн гэдгийг ярих хүн байгаа. Ийм хүнээр сургууль удирдуулахаар шийдвэр гаргаж болох уу? Тийм ёс зүйгүй үйлдлээр сургуулиас халагдчихаад эргээд очиж ажиллах нүүр тэр хүнд байна уу?
МУИС-ийн дүрмийг зөрчин тушаал гаргасан А.Галбаяр захирал өнөөдөр Бээжинд аялж байгаа нь хахууль аваад аялж байгаа гэх хардлагыг төрүүлж байгаа юм.
МУИС-ийг шинэчилнэ гэж багш нарын итгэлийг олж, шинэчлэлийн Засгийн газар байгуулагдахтай зэрэгцэн захирал болсон энэ эрхэм яагаад МУИС-ийн дүрмийг уландаа гишгэж байна вэ? А.Галтбаяр захирлын авилга авсан байх магадлалтай энэ мэт үйлдлийг бид цувралаар хүргэх болно.
А.Баярмаа
Эх сурвалж: www.dorgio.mn
