|
Видео

Шинэ мэдээ

В.Энхболд: НҮБ-ын Аюулгүйн Зөвлөлийн шинэчлэлийг ил тодоор өрнүүлэх хэрэгтэй

 
 

В.Энхболд: НҮБ-ын Аюулгүйн Зөвлөлийн шинэчлэлийг ил тодоор өрнүүлэх хэрэгтэй

 

АНУ-ын Нью-Йорк хотноо энэ сарын 16-нд НҮБ-ын Аюулгүйн Зөвлөлийн шинэчлэлийн асуудлаарх Ерөнхий Ассамблейн бүгд хуралдаан боллоо.
 
НҮБ-ын Ерөнхий Ассамблейн 75 дугаар чуулганы дарга Волкан Бозкир бүгд хуралдааны нээлтэд хэлсэн үгэндээ "Дэлхий нийтэд нүүрлээд буй "COVID-19" цар тахал, түүний улмаас НҮБ-аас хэрэгжүүлж буй үйл ажиллагааны цар хүрээг харвал Аюулгүйн Зөвлөлийн шинэчлэлийн хэрэгцээ, шаардлага бодитой оршсон хэвээр байна. Гамшиг, хямрал аливаа бүхнийг үр дүнтэй даван туулах чадвартай байвал НҮБ үндсэн зорилгоо илүү сайн биелүүлэх юм” гэжээ.
Эл хуралдаанд Монгол Улсаас НҮБ-ын дэргэд суугаа Байнгын төлөөлөгч В.Энхболд оролцож, манай улсын байр суурийг илэрхийлэв. Тэрээр хэлсэн үгэндээ, "1945 онд НҮБ байгуулагдсанаас хойших 75 жилийн хугацаанд дэлхий дахинд асар их өөрчлөлт гарсан тул улс төр, геополитикийн өнөөгийн нөхцөл байдалд нийцүүлэн НҮБ-ын Дүрмийн зорилго, зарчмуудын дагуу НҮБ-ын Аюулгүйн Зөвлөлийн шинэчлэлийн асуудлаарх Засгийн газар хоорондын яриа хэлэлцээг бүх гишүүн улсын оролцоог тэгш хангасан, ил тод байдлаар өрнүүлж, урагшуулах нь зүйтэй" гэж цохон тэмдэглэсэн.
НҮБ-ын Аюулгүйн Зөвлөлийн шинэчлэлийн асуудлаарх Засгийн газар хоорондын яриа хэлэлцээ нь уламжлал ёсоор Ерөнхий Ассамблейн 75 дугаар чуулганы турш үргэлжлэх бөгөөд 2021 оны яриа хэлэлцээг Польш Улсын Байнгын төлөөлөгч Жоанна Вронецка, Катар Улсын Байнгын төлөөлөгч Аля Ахмед Сайф Аль-Тхани нар хамтран даргалах ажээ.

Сэтгэгдэл

АНХААРУУЛГА: Уншигчдын бичсэн сэтгэгдэлд www.ENE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.