|
Видео

Шинэ мэдээ

Сэрэмжлүүлэг: Хүүхдүүд сумаар тоглож байгаад нэг нь амиа алджээ

Сэрэмжлүүлэг: Хүүхдүүд сумаар тоглож байгаад нэг нь амиа алджээ

 


Дорнод аймагт галт хэрэгсэл олсон хоёр хүүхэд түүгээрээ тоглож байгаад дэлбэрч, амь насаа алдсан хэрэг гарчээ. Тодруулбал, Дорнод аймгийн төв Хэрлэн сумын VIII багийн Цантын хүр гэдэг газарт оршин суудаг Б-гийн гэрийн гадаа сум дэлбэрснээс зургаан настай хоёр хүүгийн нэг нь нас барж, нөгөөх нь хүнд гэмтсэн байна. Мөн тухайн үед гэртээ байсан 12 настай охин нуруундаа шархаджээ.

Үүнтэй холбоотойгоор тус аймгийн Цагдаагийн газраас Засаг дарга М.Бадамсүрэнд хандан холбогдох арга хэмжээ авхуулах саналаа албан бичгээр илэрхийлсэн юм байна. Улмаар ЗХЖШ-аас томилогдсон хайгуул, устгалын тусгай бүлгийнхэн Дорнодод ажиллаж, Хэрлэн сумын V багийн нутаг, Өгөөмөр гэх газраас цэргийн зориулалттай, 13 нэр төрлийн 176 ширхэг тэсэрч дэлбэрэх сум, галт хэрэгсэл илрүүлж, аюулгүй болгох ажиллагааг цагдаагийн ажилтнуудтай хамтран зохих журмын дагуу гүйцэтгэжээ.

Цагдаа, цэргийн алба хаагчид олсон сум, галт хэрэгслээ тавдугаар сарын 27-нд дэлбэлж, устган аюулгүй болгосон юм байна. Гэвч дахиад их хэмжээний галт хэрэгсэл олсон гэнэ. Дорнод аймгийн Цагдаагийн газрын алба хаагчид, ЗХЖШ-ын даргын тушаалаар байгуулсан Хайгуулын бүлэг болон аймгийн Засаг даргын захирамжаар батлагдсан ажлын хэсгийнхэн Баянтүмэн сумын IV багийн нутаг дэвсгэрээс 150-200 ширхэг дарь цэнэгтэй сумны хошуу илрүүлжээ. Өдгөө цэргийн анги, нэгтгэлүүд байрлаж байсан болон байлдааны буудлагатай хээрийн сургууль явуулсан газар, оронд үргэлжлүүлэн хайгуул хийж байна.

Иргэд хээрээс сум, галт хэрэгсэл олоод төмрийн хогонд тушаах гэж оролдон, амь, эрүүл мэндээрээ хохирох явдал цөөнгүй гардаг. Тиймээс сум, галт хэрэгсэл олсон тохиолдолд түүгээр оролдолгүй холбогдох байгууллагад нэн даруй мэдэгдэхийг цагдаагийн байгууллагаас санууллаа.


Сэтгэгдэл

АНХААРУУЛГА: Уншигчдын бичсэн сэтгэгдэлд www.KINGNEWS.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.